Taliyaha ciidanka Xoogga Dalka Jeneral Cabdiwali Jaamac Gorod oo ay wehliyaan Saraakiil ka tirsan Ciidanka Xoogga dalka ayaa tabbabar u furay cutubyo ka tirsan ciidanka ururka 60aad ee xoogga dalka, kaasi oo socon doono muddo saddex bil ah.
Gashaanle Dhaxe Odowaa Yuusuf Raage Taliyaha ururka 60aad ee Ilaalada Madaxtoyada Soomaaliya oo ka hadlay munaasabadda ayaa ciidamada ugu baaqay in ay ka faa’iideestaan muddada uu socdo tababarka iyo waxyaabaha lagu baran doono
“Mudane Taliye waxaa halkaan taagan in ka badan 100 askari oo ka tirsan Ururka 60aad ee Ilaalada Madaxtooyada Qaranka waxaan ciidamada maanta loo furayo tababarka ugu baaqayaa in ay ka faa’iidestaan tababarka lasiin doono” ayuu yiri Gaashaanle Dhexe Odowaa.
Taliyaha ciidanka Xoogga Dalka Sareeyo Gaas Cabdiwali Jaamac Gorod ayaa ciidamada Xoogga dalka ugu digay in xilliga shaqada lagu guda jiro in ay isticmaalaan Muqaadaraadka.
“Ciidanka Xoogga Dalka Soomaaliyeed daraagiska waaka xaaraan, wixii qaad cuna oo ka tirsan ciidanka Xoogga Dalka waan ka saareynaa gaar ahaan kuwa ka tirsan Madaxtooyada Qaranka” ayuu yiri Taliyaha.
Sidoo kale Jeneraal Gorod ayaa sheegay in askarigii lagu helo isagoo iibsanayo hubka dowladda la horgeen doono Maxkamada Ciidamada Qalabka Sida
“Waxaan kale oo aan digniin adag u dirayaa kuwa caadeestay in ay iibsadaan hubka iyo dareeska ciidanka qofkii lagu helo waxaan horgeyneynaa sharciga, isagoo muteysan doonna xabsi ciidan iyo in laga saaro ciidanka”ayuu hadalkiisa ku soo gabo gabeeyay taliyaha ciidanka Xoogga Dalka Soomaaliyeed.
