Munaasabad lagu qabtay magaalada Muqdisho ayaa soo dhaweyn diirran loogu sameeyay Taliyaha Guutada 21-aad qaybta 1-aad ee Kumaandooska Gorgor Gaashaanle Sare Maxamed Axmed (Korneyl Lacag) iyo cutubyo ciidan ah oo dalka Turkiga kusoo qaatan tababar heer sare ah.
Munaasabadda oo ay soo qaban qaabiyeen hoggaanka Taliska Qaybta 1-aad ee Kumaandooska Gorgor oo hoggaaminayay Gaashaanle Sare Saahid Jaamac Faarax , waxaa ka qay bgalay saraakiil iyo Ciidamo ka tirsan Xoogga Dalka.
Munaasabadda soo dhaweynta sidoo kale waxaa goobjoog ka ahaa Taliyeyaasha Guutooyinka 17-aad iyo 19-aad Kumaandooska Gorgor ee Ciidanka Xoogga Dalka Soomaaliyeed, si loo dhiirigeliyo cutubyada cusub ee kusoo biiraya Ciidanka.
Taliyaha Qaybta 1-aad ee Kumaandooska Gorgor G/sare Saahid Jaamac Faarax oo ka hadlay goobta ayaa soo dhaweyn u sameeyay cutubka ciidan, isagoo xusay in laga filayo inay si hufan uga qayb qaataan waajibaadka qaran ee loo igmaday.
Taliyaha Guutada 21-aad ee Kumaandooska Gorgor ayaa u mahadceliyay Saraakiisha iyo Ciidamada soo dhaweynta ballaaran u sameeyay, waxaana uu cutubyada cusub kula dardaarmay inay waxii ay soo barteen uga faa’iideeyaan dalkooda, dadkooda, islamarkaana ay ilaaliyaan anshaxa iyo waajibaadka ciidanimo.
