Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayay Telefishinka Qaranka, lagana dhageystay Idaacadda Radio Muqdisho ayaa waxaa caawa kulankii labaad ku balansanaa tartamayaasha Degmooyinka Beledweyne ee gobolka Hiiraan iyo Jowhar ee Gobolka Shabeelaha Dhexe, waxaana tartanka caawa ka baaqsaday oo aan ka soo qeyb gelin tartamayaasha Degmada Jowhar.
Guddiga tartan cilmiyeedka Warbaahinta Qaranka ayaa sheegay in tartamayaasha degmada Jowhar ay jebiyeen nuqul ka mid ah sharciyada tartan cilmiyeedka Warbaahinta Qaranka u degsanaa, waxaana Yaxye Cali Faarax oo daawadayaasha iyo dhageystayaasha u akhriyay sharuucda tartanka uu shaaciyay in sharciyada tartanka ay ku xadgudbeen tartamayaasha Degamda Jowhar, sidaas darteedna dhibcaha ay la wareegeen tartamayaasha Degamda Beledweyne.
“Tartamaayasha degmada Jowhar ee xarunta Gobolka Shabeelaha Dhexe waxa ay ku xadgudbeen qodobka koowaad ee tartanka oo dhigaya in Degmo kasta ay ilaaliso waqtiga tartanka, kaasi oo ah in Degmadu in xaqiijiso diyaar-garowgeeda tartanka maalin ka hor xilliga uu dhacayo tartanka iyo in tartamayaashu diyaar ku ahaadaan goobta iyo khadka ay barnaamijka uga qeyb galayaan ugu dambeyn 30 daqiiqo ka hor xilliga tartanka uu billaabanayo oo ah 9:30 Habeennimo, sidaas darteed caawa waxaa dhibcaha qaatay tartamaayasha Degmada Beledweyne” ayuu yiri Yaxye Cali Faarax.
Habeen dambe oo ah habeenka saddexaad ee tartan cilmiyeedka hadii uu Alle idmo barnaamijka waxaa ku tartami doona tartamayaasha degmooyinka Waaberi VS Shangaani oo ka wada tirsan Gobolka Benaadir.
ย ย 
Sawir Qaade:- Mohamed White-ka
