Tartan Cilmiyeedka bisha Ramadaan oo ay si wada jir ah u baahinayaan Radio Muqdisho iyo Telefishinka Qaranka Soomaaliyeed ee SNTV, isla markaana si toos ah looga daawanayo Telefishinka, halka dhageystayaasha ay kala socdaan Idaacadda, uuna taaba gelineyo sanadkii saddexaad oo is xiga Maamulka Gobolka Benaadir ayaa waxaa caawa tartanka ku balansanaa tartamayaasha degmooyinka Garooweย Vs kaaraan oo ka kala tirsan Gobollada Nugaal iyo Banaadir, iyadoo ay soo xaadiri waayeen tartamayasha degmada Garoowe.
Guddoomiyaha Guddiga Tartan aqooneedka Warbaahinta Qaranka Maxamed Abuukar Axmed Ma’da ayaa caawa sharxay sababta keentay in tartamayaasha degmada Garoowe ee gobolka Nugaal ay u soo xaadiri waayeen,ย oo uu ku sheegay inay cudur daar sheegteen, balse laga qanciyay, inkasta oo ay soo buuxin waayeen markii dambe sharuucda tartanka u degsan.
Maxamed Abuukar Axmed Ma’da ayaa sheegay in tartamayasha degmada Garoowe ay caawa soo xaadiri waayeen tartanka, isla markaana ay jebiyeen qodob ka mid ah sharciyadii tartanka u degsanaa, waxaana uu intaa ku daray in Guddiga ay ka fariisteen arrinta laga yeelayo tartamayaasha degmada Garoowe, taasi oo u soo baxday in dhibcaha si fudud caawa ku qaataan tartamayaasha degmada Kaaraan, maadaama dhinacii la tartami lahaa ay soo xaadiri waayeen.
“Sharuuradaha tartanka waxaa ka mid ah in degmo weliba ay 24 saac ka hor soo gudbiyaan tartanka inay ka qeyb galayaan, laakiin tartamayaasha degmada Garoowe markii hore diyaar ayay ahaayeen, laakiin markii dambe cudur daar ayay sheegteen, waxaana ku qancinay inay kaqeyb galaan ilaa caawa sacaddu markii ay ahayd 8:00 pm fiidnimo ayaana la sugayay, balse Guddiga waxa ay go’aansadeen in dhibcaha ay siiyaan tartamayaasha degmada Kaaraan oo caawa u soo xaadiray ka qeyb galka tartanka”ayuu yiri Maxamed Abuukar Ma’da oo hadalkiisa ku daray in tartamayaasha degmada Kaaraan ay u soo gudbineen wareegga xiga.
Habeen dambe oo ah habeenka 8aad ee tartan Cilmiyeedka bisha Ramadaan ee Warbaahinta Qaranka waxaa ku tartami doona degmooyinka Kismaayo Vsย Heliwaa oo ka kala tirsan Gobollada Jubbada Hoose iyo Benaadir .
