Tartan cilmiyeedka bisha Ramadaan oo galay sanadkii sagaalaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa Tobnaad oo ah wareegga koowaad ku tartamay tartameyaasha Degmooyinka Buur-hakaba Vs Boosaaso oo ka kala tirsan Gobollada Baay iyo Bari, waxaana barnaamijka sanadkii todobaad oo xiriir ah taabagelineya Maamulka Gobolka Benaadir.
Tartameyaasha labada degmo ee Buur-hakaba Vs Boosaaso ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac.
Buur-hakaba
Tartameyaasha Degmada Buur-hakaba ee gobolka Baay waxaa la weydiiyey todobo Su’aal, waxa ay ka jawaabeen Lix su’aal, waxaana ay iska qaldeen Hal su’aal, waxa ay ka faa’iideysteen Labo su’aal oo soo hareer martay tartamayaasha Degmada Boosaaso, sidaa darteed wadarta guud ee dhibcaha tartameyaasha Degmada Buur-hakaba ay heleen waxay noqotay lix iyo toban (16) dhibcood.
Boosaaso
Tartamayaasha Degmada Boosaaso ee Gobolka Bari waxaa dhankooda la weydiiyay todobo su’aal, waxa ay ka jawaabeen Labo su’aal, iyagoo iska qalday Shan su’aal, ma jirin wax ka faa’iideysi ah oo ay heleen, sidaasi darteed wadarta guud ee dhibcaha ay heleen tartameyaasha Degmada Boosaaso waxay noqotay Afar (4) dhibcood.
Tartamayaasha Degmada Buur-hakaba ee Gobolka Baay ayaa caawa u soo gudbay wareegga labaad ee tartanka.
Habeen dambe haddii uu Alle idmo oo ah habeenka Kow iyo tobnaad ee tartanka, waxaa foodda is dari doono, tartamaayasha degmooyinka Howlwadaag Vs Gaalkacyo oo ka kala tirsan Gobollada Benaadir iyo Mudug.
