Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankii sagaalaad oo ah wareegga koowaad ku tartamay tartameyaasha Degmooyinka Kaaraan Vs Gaalkacyo oo ka kala tirsan Gobollada Banaadir iyo Mudug, waxaana barnaamijka sanadkii shanaad oo xiriir ah taabagelineya Maamulka Gobolka Benaadir.
Tartameyaasha labada degmo ee Kaaraan VS Gaalkacyo ayaa muujiyey tartan aad u adag oo noqday kii ugu dhibcaha badnaa, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac.
Kaaraan
Tartameyaasha Degmada Kaaraan ee gobolka Banaadir waxaa la weydiiyey todobo Su’aal ma jirin hal su’aal oo ay ka jawaabeen, mana jirin wax ka faa’iideysi ah oo ay heleen, sidaa darteed wadarta guud ee dhibcaha tartameyaasha Degmada Kaaraan ay heleen waxay noqotay eber (0) dhibcood, waxaana ay noqdeen taariikhda degmadii ugu horeysay ee eber la timaada inta uu tartantankan soo bilowday tan iyo sanadkii 2012-ka..
Gaalkacyo
Tartamayaasha Degmada Gaalkacyo ee Gobolka Mudug waxaa dhankooda la weydiiyay todobo su’aal, waxa ay ka jawaabeen labo su’aal, iyagoo iska qalday shan su’aal, waxa ay ka faa’iideysteen hal suaal oo soo hareer martay Kaaraan, sidaasi darteed wadarta guud ee dhibcaha ay heleen tartameyaasha Degmada Gaalkacyo waxay noqotay lix (6) dhibcood.
Tartamayaasha Degmada Gaalkacyo ee Gobolka Mudug ayaa caawa u soo gudbay wareegga labaad ee tartanka
Habeen dambe haddii uu Alle idmo oo ah habeenka tobnaad ee tartanka, waxaa foodda is dari doono, tartamaayasha degmooyinka Marka Vs Hiliwaa oo ka kala tirsan Gobolada Shabeelaha Hoose iyo Banaadir.
Sawir Qaade Qadar Cali Nuur
