Tartan Cilmiyeedka bisha Ramadaan oo ay si wada jir ah u baahinayaan Radio Muqdisho iyo Telefishinka Qaranka Soomaaliyeed ee SNTV uuna taaba gelineyo sanadkii labaad Maamulka Gobolka Benaadir ayaa waxaa caawa tartan aad u xiiso badan ku dhexmaray degmooyinka Jowhar Vs Hodan oo ka kala tirsan Gobollada Shabeelaha Dhexe iyo Banaadir, iyadoo labada dhinac ay muujiyeen dadaal iyo anshax wanaag inta uu tartanku socday.
Sida uu xeerka tartanka qabo marka degmo walibo la weydiiyo min afar su’aal waxaa caawa dhextaal u ahaa isbarashada degmooyinka, iyadoo tartamayaasha labada degmo ay ka sheekeeyeen taariikhda ay leeyihiin degmooyinka Jowhar iyo Hodan, iyo sidoo kale waxyaabaha ay caanka ku yihiin oo ay ku cabireen hab suugeed.
Natiijada tartankii dhexmaray caawa tartamayaasha degmooyinka Jowhar iyo Hodan waxey noqotay sidan:-
Jowhar
Tartamayaasha Degmada Jowhar sida xeerka barnaamijka tartan Cilmiyeedka bisha barakeysan ee Ramadaan uu dhigayo waxaa la weeydiiyey Todobo Su’aal, waxaana su’aallihii la weydiiyey ay ka jawaabeen Saddex su’aal oo waxa ay iska qaldeen Afar su’aal, ma jirin wax ka faa’iideysi ah oo ay heleen, waxayna wadarta guud ee dhibcaha tartamayaasha degmada Jowhar ay heleen noqoneysaa 6 dhibcood (Lix dhibcood).
Hodan
Tartamayaasha Degmada Hodan waxaa iyana dhankooda la weydiiyey Todobo Su’aal, su’aallihii la weydiiyey waxay si sax ah uga jawaabeen Shan su’aal, halka ay iska qaldeen labo su’aal, Waxa ay ka faa’iideysi u heleen hal su’aal oo soo hareermartay tartamayaasha Degmada Jowhar, waxaana wadarta guud ee tartamayaasha degmada Hodan ka dhigeysaa inay heleen 12 dhibcood (Labo iyo Toban dhibcood).
Tartamayaasha degmada Hodan oo su’aal la weydiiyay intii lagu gudaha jiray qeybtii hore ee tartanka ayaa markii la gaaray waqtigii jawaabta khadka teleefonka ka go’ay, balse markale waxa ay fursad u heleen in su’aasha ka jawaabaan, hayeeshee way ka faa’iideysan waayeen, waxana loo gudbiyay dhanka tartamayaasha degmada Jowhar, inkasta oo Jowhar ay markeeda khadka ka baxday, waxaana jawaabta ku dhawaaqay guddiga tartanka oo digniin u jeediyay tartamayaasha labada degmo.
Hadaba kulankii 10aad ee tartan Cilmiyeedka bisha Ramadaan ee Warbaahinta Qaranka caawa waxaa wareega xiga u soo gudbay tartamayaasha degmada Hodan ee gobolka Banaadir, ayadoo gebagebadii ay labada tartame isugu hambalyeeyeen guushaasi.
Habeen dambe oo ah habeenka 11aad ee tartan Cilmiyeedka bisha Ramadaan ee Warbaahinta Qaranka waxaa ku tartami doona degmooyinka Dharkeeynleey iyo Heliwaa oo ka wada tirsan Gobolka Banaadir.
