Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankii labo iyo tobnaad oo ah wareegga koowaad ku tartamay tartameyaasha Degmooyinka Xudur Vs Kaxda oo ka kala tirsan Gobolada Bakool iyo Banaadir, waxaana barnaamijka sanadkii shanaad oo xiriir ah taabagelineya Maamulka Gobolka Benaadir.
Tartameyaasha labada degmo ee Xudur Vs Kaxda ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanku socday.
Xudur
Tartameyaasha Degmada Xudur ee gobolka Bakool waxaa la weydiiyey todobo Su’aal, waxa ay ka jawaabeen Hal su’aal, waxaana ay iska qaldeen lix su’aal, Waxa ay ka faa’iideysteen Labo su’aal oo soo hareeer martay tartamayaasha Degmada Kaxda, sidaa darteed wadarta guud ee dhibcaha tartameyaasha Degmada Xudur ay heleen waxay noqotay lix (6) dhibcood.
Kaxda
Tartamayaasha Degmada Kaxda ee gobolka Banaadir waxaa dhankooda la weydiiyay todobo su’aal, waxa ay ka jawaabeen Labo su’aal, iyagoo iska qalday shan su’aal, waxa ay ka faa’iideysatay labo suaal oo soo hareer martay Xudur, sidaasi darteed wadarta guud ee dhibcaha ay heleen tartameyaasha Degmada Kaxda waxay noqotay sideed (8) dhibcood.
Tartamayaasha Degmada Kaxda ee Gobolka Banaadir ayaa caawa u soo gudbay wareegga labaad ee tartanka
Habeen dambe haddii uu Alle idmo oo ah habeenka saddex iyo tobnaad ee tartanka, waxaa foodda is dari doono, tartamaayasha degmooyinka Wadajir Vs Shingaani oo ka wada tirsan Gobolka Banaadir.
