Tartan cilmiyeedka bisha Ramadaan oo ay si wada jir ah u baahinayaan Radio Muqdisho iyo Telefishinka Qaranka Soomaaliyeed ee SNTV, uuna taaba gelineyo sanadkii saddexaad Maamulka Gobolka Benaadir ayaa caawa wareegiiisa saddexaad waxaa tartan aad u xiiso badan ku dhexmaray degmooyinka C/casiis Vs Kismaayo oo ka kala tirsan Gobolada Banaadir iyo Jubbada Hoose, iyadoo labada dhinac ay muujiyeen dadaal iyo anshax wanaag inta uu tartanku socday.
Tartanka oo ahaa mid aad u xiiso badan ayaa tartamayaasha labada degmo waxa ay muujiyeen tartan wanaag oo ku dhisan aqlaaq iyo aqoon.
Natiijada tartankii dhexmaray xalay tartamayaasha degmooyinka C/casiis iyo Kismaayo waxey noqotay sidan:-
C/casiis
Tartamayaasha Degmada C/casiis sida xeerka barnaamijka tartan Cilmiyeedka bisha barakeysan ee Ramadaan uu dhigayo waxaa la weeydiiyey Todobo Su’aal, waxaana su’aallihii la weydiiyey ay ka jawaabeen Hal su’aal oo waxa ay iska qaldeen Lix, mana jirin wax ka faa’iideysi ah oo ay heleen tartamayaasha C/casiis, wadarta guud ee dhibcaha tartamayaasha degmada C/casiis ay heleen noqoneysaa 2 dhibcood (Labo dhibcood).
Kismaayo
Tartamayaasha Degmada Kismaayo waxaa iyana dhankooda la weydiiyey Todobo Su’aal, su’aallihii la weydiiyey waxay si sax ah uga jawaabeen Saddex su’aal, halka ay iska qaldeen Afar su’aal, waxa ay si ka faa’iideysi ah u heleen labo su’aal oo soo hareer martay tartamayaasha degmada C/casiis, waxaana wadarta guud ee tartamayaasha degmada Kismaayo ka dhigeysaa inay heleen 10 dhibcood (Toban dhibcood).
Tartamayaasha degmada Kismaayo ee xarunta gobolka Jubbada Hoose ayaa u soo gudbay wareegga afaraad ee tartanka, iyadoo labada tartame ay isugu hambalyeeyeen guusha midba midda kale ka gaartay.
Habeen dambe waxaa ku tartami doono tartan cilmiyeedka Warbaahinta Qaranka Degmooyinka Garbahaareey iyo Boosaaso oo ka kala tirsan gobollada Gedo iyo Bari.
Sawir Qaade:-Farxaan Suleymaan Daahir
