Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankii sagalaad ku tartamay tartameyaasha Degmooyinka Wadajir VS Xamar Jabjab oo ka Gobolka Benaadir, waxaana barnaamijka sanadkii afaraad oo xiriir ah taabagelineya Maamulka Gobolka Benaadir.
Tartameyaasha labada degmo ee Wadajir VS Xamar Jabjab ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon, waxaana sida sharciga qabo marka labada degmo la weydiiyo min afar su’aal la guda galay isbarashada degmooyinka iyo waxyaabaha ay degmo kasta caan ku tahay oo maqal iyo muuqaalba leh.
Wadajir
Tartameyaasha Degmada Wadajir ee gobolka Benaadir waxaa la weydiiyey todobo Su’aal, waxaana ay si sax ah uga jawaabeen labo su’aal, waxaana ay iska qaldeen shan su’aal, waxa ay si ka faa’iideysi ah u heleen hal su’aal oo soo hareer martay tartamyaasha degmada Xamar Jabjab, hadaba wadarta guud ee dhibcaha tartameyaasha Degmada Wadajir ay heleen waxay noqoneysaa lix (6) dhibcood.
Xamar Jabjab
Tartamayaasha Degmada Xamar Jabjab ee gobolka Benaadir waxaa dhankooda la weydiiyay todobo su’aal, waxa ay ka jawaabeen hal su’aal, waxa ay iska qaldeen lix su’aal, mana jirin wax ka faa’iideysi ah oo ay heleen tartamayaasha degmada Xamar Jabjab, waxaana wadarta guud ee dhibcaha tartameyaasha degmada Xamar Jabjab ay noqotay labo (2) dhibcood.
Tartamayaasha Degmada Wadajir ee gobolka Benaadir ayaa caawa u soo gudbay wareegga labaad ee tartanka.
Hadaba Habeen dambe oo ah habeenka tobnaad ee tartan cilmiyeedka Warbaahinta Qaranka hadii uu Alle idmo barnaamijka waxaa ku tartami doona tartamayaasha degmooyinka Garbahaareey Vs Hodan oo ka kala tirsan Gobollada Gedo iyo Benaadir.
Sawir Qaade: Khadar Cali Nuur
