Tartan cilmiyeedka bisha Ramadaan oo galay sanadkii saddex iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 2-aad ee wareegga koowaad ku tartamay Degmooyinka Xudur iyo Warta-Nabadda oo ka kala tirsan Gobollada Bakool iyo Banaadir, waxaana barnaamijka si wadajir ah u taaba-gelineya Bankiga IBS iyo Maamulka Gobolka Banaadir.
Tartameyaasha labada degmoo ee Xudur iyo Warta-Nabadda ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
Xudur
Tartameyaasha Degmada Xudur ee Gobolka Bakool waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Afar su’aal, halka ay iska qaldeen Saddex su’aal, balse waxa ay ka faa’iideysteen Labo su’aal oo soo hareermartay dhigooda Warta-Nabadda, sidaa darteed wadarta guud ee dhibcaha tartameyaasha Degmada Xudur ay heleen waxay noqotay Labo iyo Toban (12) dhibcood.
Warta-Nabadda
Tartamayaasha Degmada Warta-Nabadda ee Gobolka Banaadir waxaa dhankooda la weydiiyay todobo su’aal, waxa ay ka jawaabeen Labo su’aal, iyagoo iska qalday Shan su’aal, waxa ay ka faa’iideesteen Hal su’aal oo soo hareermartay Tartamaayasha Xudur, sdaa darteed wadarta guud ee dhibcaha ay heleen tartameyaasha Degmada Warta-Nabadda waxay noqotay Lix (6) dhibcood.
Hadaba kulankii 2-aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga xiga u soo gudbay tartamayaasha Degmada Xudur ee Gobolka Bakool, ayadoo gebagebadii ay labada tartame isugu hambalyeeyeen guushaasi.
Barnaamijka sanadkan oo lagu soo kordhiyay su’aalo la weydiinayo dhageystayaasha iyo daawadayaasha ku taxan tartanka, waxaana jawaabta haleelay Cali Cumar Xuseen oo ku guuleystay abaal marin 50$ dollar oo ay bixineyso Bankiga IBS.
Agaasime Jeyte ayaa xusay in su’aalahan ay jiri doonaan habeen kasta marka la gaaro xilliga dhextaalka tartanka.
Habeen dambe haddii uu Alle idmo oo ah habeenka 3-aad ee tartanka, waxaa ku loolami doona degmooyinka Kaxda iyo Jowhar oo ka kala tirsan Gobollada Banaadir iyo Shabeellaha Dhexe.
Sawir qaade Khadar Cali Nuur
