Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankii sideedaad oo ah wareegga koowaad ku tartamay tartameyaasha Degmooyinka Boosaaso Vs Garoowe oo ka kala tirsan Gobollada Bari iyo Nugaal, waxaana barnaamijka sanadkii shanaad oo xiriir ah taabagelineya Maamulka Gobolka Benaadir.
Tartameyaasha labada degmo ee Boosaaso VS Garoowe ayaa muujiyey tartan aad u adag oo noqday kii ugu dhibcaha badnaa, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac.
Boosaaso
Tartameyaasha Degmada Boosaaso ee gobolka Bari waxaa la weydiiyey todobo Su’aal, waxa ay ka jawaabeen saddex su’aal, waxaana ay iska qaldeen afar su’aal, waxa ay ka faa’iideysteen hal su’aal oo soo hareermartay tartamaayasha Degmada Garoowe, sidaa darteed wadarta guud ee dhibcaha tartameyaasha Degmada Boosaaso ay heleen waxay noqotay sideed (8) dhibcood.
Garoowe
Tartamayaasha Degmada Garoowe ee gobolka Nugaal waxaa dhankooda la weydiiyay todobo su’aal, waxa ay ka jawaabeen saddex su’aal, iyagoo iska qalday afar su’aal, waxa ay ka faa’iideysatay saddex suaal oo soo hareer martay Boosaaso, sidaasi darteed wadarta guud ee dhibcaha ay heleen tartameyaasha Degmada Garoowe waxay noqotay labo iyo toban (12) dhibcood.
Tartamayaasha Degmada Garoowe ee Gobolka Nugaal ayaa caawa u soo gudbay wareegga labaad ee tartanka
Habeen dambe haddii uu Alle idmo oo ah habeenka Sagaalaad ee tartanka, waxaa foodda is dari doono, tartamaayasha degmooyinka Gaalkacyo Vs Kaaraan oo ka kala tirsan Gobolada Mudug iyo Banaadir.
