Tartan Cilmiyeedka bisha Ramadaan oo ay si wada jir ah u baahinayaan Radio Muqdisho iyo Telefishinka Qaranka Soomaaliyeed ee SNTV uuna taaba gelineyo sanadkii labaad Maamulka Gobolka Benaadir ayaa waxaa caawa tartan aad u xiiso badan ku dhexmaray degmooyinka Xudur Vs Kaxda oo ka kala tirsan Gobollada Bakool iyo Banaadir, iyadoo labada dhinac ay muujiyeen dadaal iyo anshax wanaag inta uu tartanku socday.
Sida uu xeerka tartanka qabo marka degmo walibo la weydiiyo min afar su’aal ayaa waxaa caawa dhextaal u ahayd, isla markaana la guda galay isbarashada degmooyinka, iyadoo tartamayaasha labada degmo ay ka sheekeeyeen taariikhda ay leeyihiin degmooyinka Xudur iyo Kaxda, iyo sidoo kale waxyaabaha ay caanka ku yihiin oo ay ku cabireen hab suugeed.
Natiijada tartankii Quruxda badnaa ee dhexmaray caawa tartamayaasha degmooyinka Xudur iyo Kaxda waxey noqotay sidan:-
Xudur
Tartamayaasha Degmada Xudur sida xeerka barnaamijka tartan Cilmiyeedka bisha barakeysan ee Ramadaan uu dhigayo waxaa la weeydiiyey Todobo Su’aal, waxaana su’aallihii la weydiiyey ay ka jawaabeen Saddex su’aal oo waxa ay qaldeen afar su’aal, waxa ay si ka faa’iideysi ah u heleen Labo su’aal oo soo hareermartay tartamayaasha degmada Kaxda, waxayna wadarta guud ee dhibcaha tartamayaasha degmada Xudur ay heleen noqoneysaa 10 dhibcood (Toban dhibcood).
Tartamayaasha degmada Xudur ayaa waxaa caawa lagu qaaday xeerka u degsan tartanka, maadaama su’aal soo hareermartay tartamaayasha Kaxda ay ka faaiideysan waayeen xilligii loo baahnaa, sababo la xariira in khadka uu ka go’ay, sida sharciga tartankana u degsan ay tahay in, iyada oo ka faa’iideysi ah degmadii khadka ka baxda, waqti kale uma heleyso inay fursad u hesho, maadaama ay su’aashi ahayd mid ka faa’iideysi ah, sida ay guddiga ku dhawaaqeen.
Kaxda
Tartamayaasha Degmada Kaxda waxaa iyana dhankooda la weydiiyey Todobo Su’aal, su’aallihii la weydiiyey waxay si sax ah uga jawaabeen afar su’aal halka ay iska qaldeen saddex su’aal, Waxa ay ka faa’iideysi u heleen hal su’aal oo soo hareermartay tartamayaasha Degmada Xudur, waxaana wadarta guud ee tartamayaasha degmada Kaxda ka dhigeysaa inay heleen 10 dhibcood (Toban dhibcood).
Guddiga tartan cilmiyeedka Warbaahinta Qaranka ayaa su’aalo dheeraad ah ku daray tartanka, maadaama labada tartame ay isla dhaafi waayeen su’aalihii barnaamijka loogu talagalay, waxaana tartamayaasha degmada Xudur ay si sax ah uga Jawaabeen su’aashii la weydiiyay, inkasta oo ay ka faa’iideysi waayeen su’aal soo hareermartay tartamaayasha degmada Kaxda, waxaana Wadarta guud ee tartamaayasha degmada Kaxda ay heleen 10 dhibcood, Halka tartamaayasha degmada Xudur ay la timid 12 dhibcood, maadaama ay ka jawaabeen su’aashii dheeraadka ahayd ee sideedaad.
Hadaba kulankii Todobaad ee tartan Cilmiyeedka bisha Ramadaan ee Warbaahinta Qaranka caawa waxaa wareega xiga u soo gudbay tartamayaasha degmada Xudur ee gobolka Bakool, ayadoo gebagebadii ay labada tartame isugu hambalyeeyeen guushaasi.
Habeen dambe oo ah habeenka Sideedaad ee tartan Cilmiyeedka bisha Ramadaan ee Warbaahinta Qaranka waxaa ku tartami doona degmooyinka Xamarweyne iyo Xamar Jajab ee Gobolka Banaadir.
