Tartankan isboorti oo loogu tala galay in lagu xoojiyo isdhexgalka bulshada iyo nabadda isla markaana socon doono muddo 3 cisho ah ayaa ka furmay degmada Shangaani ee gobolka Banaadir, taasi oo ay ku tartamayeen laba kooxood oo ka kala yimid Waaxda Mooyaale iyo Waaxda Jabuuti, iyadoo tartanka ay ka qeyb qaadan doonan cayaartoy laga soo kala xulay afarta Waaxood ee Degmada Shangaani.
Tartankan isboorti oo ay si wada jir ah u soo qaban qaabiyeen Hay’adda wacyi gelinta bulshada Soomaaliyeed ee marka magaceeda la soo gaabiyo loo yaqaan C.C.A ayaa waxaa ka qeyb galay Maamulka degmada mas’uuliyiinta hay’adda C.C.A iyo dadweyne kale oo aad u farabadan ee ka kala yimid afarta Waaxood ay ka koobantahay degmada Shangani ee gobolka Banaadir.
Ciyaarta oo ahayd mid xiisa galisay dadkii u soo daawasho tegay ayaa waxaa ay ku soo idlaatay 3 iyo 2 oo ay guusha ku raacday cayaartoyda u tartamaysay Waaxda Mooyaale.
Agaasimaha hay’adda wacyigalinta bulshada Soomaaliyeed C.C.A Maxamed Cabdi Xasan Sandheere ayaa tilmaamay in ahmiyad gaar ah ay bulshada u leedahay tartamada nuucaani oo kale ah, isla markaana ay yihiin kuwa xoojinaya isdhexgalka bulshada.
Guddoomiyaha degmada Shangaani ee gobolka Banaadir Saciid Cabdiqaadir “Saciid Buuwe” ayaa kula dardaarmay dhallinyarada in ay ka faa’iideystaan tartamada cayaaraha, isagoo u mahadceliyay mas’uuliyiinta hay’ada wacyigalinta bulshada C.C.A sida ay u garab taaganyihiin dhallinyarada Soomaaliyeed .
“C.C.A waxaan aad aad ugu faraxsanahay iney noo keeneen cayaar xilli habeen ah la ciyaaraayo oo isdhexgal bulsho ah ee afarta Waaxood ee degmada, waana soo dhaweeheynaa, Caawa labo koox ayaa cayaartay, Habeen dambe laba kooxood habeenka Jimcaha Insha Allah haduu ilaahey idmana aan soo qatimi doono, kooxdii reysana aan abaal marin siin doono” ayuu yiri Guddoomiyaha Degmada Shangaani.
Maamulka gobolka Banaadir ayaa waday dadaalo lagu horumarinayo isdhexgalka bulshada, iyadoo loo marayo tartamo isboorti oo kala duwan.
