Cayaartaan oo dhexmartay degmooyinka Yaaqshiid iyo Hiliwaa ee gobolka banaadir ayaa waxa ay daqiiqadihii loogu talagalay kusoo idlaaday 1-0 oo ay guusha ku raacday cayaaartooyda degmada Yaaqshiid ee gobolka Banaadir.
Caruurtan guleysatay ayaa waxa ay dalka Qatar kaga qeyb geli doonaan tartan dugsiyada ah oo ay qabaneyso dowladda Qatar, kaasi oo ay ka qeyb geli doonaan carruurta ka socota dugsiyada Hoose iyo dhexe ee dalalka Jaamacadda Carabta.
Munaasabada gabagabada cayaartaan ayaa waxaa ka qeybgalay Wasiiro, maamulka Gobolka Banaadir , xubno ka socday xiriirka kubada cagta iyo dadweyne aad u fara badan oo usoo dawasha tagay cayaarta lagu qabtay garoonka kubadda cagta ee Stadium Koonis ee degmada C/casiis.
Guddoomiyaha Gobolka Banaadir ahna duqa Muqdisho Yuusuf Xuseen Jimcaale ayaa sheegay in maamulka gobolka uu qaban doono tartanka sanadka cusub , isgoo bogaadiyay cayaa wanaaga ay soo bandhigeen carruurtaan.
Wasiirka Dhallinyarada iyo Cayaaraha Mudane Maxamed Cabdullaahi Xasan oo ka hadlay madasha ayaa amaan u jeediyay caruurtaan sida wanaagsan ee ay u soo bandhigeen cayaarta isgoo u rajeeyay in ay guul kasoo hoyaan cayaaraha ay ka qeybgali donaan.
Wasiirka Howlaha guud Eng Saalax Shiiq Cismaaan oo ka mid ahaa xubnaha Golaha Wasiirada ee ka qeybgalay Munaasabada ayaa isna wax lagu farxo ku tilmaamay qaabka ay usoo bandhigeen cayaarta.
Wasiirka Waxbarashada Khadro Bashiir Cali ayaa xustay inay tahay wax lagu farxo in carruur da’dan la eg ay dalka dibadiisa uga qeyb galaan tartan kubadda cagta ah ee loo qabanayo dugsiyada dalalka Jaamacadda Carabta.
Wasiirka amniga gudaha Mudane Cabdirisaaq Maxamed Cumar ayaa soo xiray tartanka ayaa tilmaamay in cayaartooyda da’yarta ay soo bandhigeen xirfad wanaagsan, waxaana uu u rajeeyay inay guul ka soo hooyaan tartanka lagu qaban doono dalka Qatar.
Ugu dambeyn waxaa halkaasi abaal marino kala duwan la guddoonsiiyay kooxihii ka qeyb galay tartanka lagu xulayay cayaartooy da’yar oo matasha magaca Soomaaliya.
Sawir Qaade:- Farxaan Suleymaan Daahir
