Dowladda soomaaliya waxa uga qeyb galay shirkaasi ay hay’adda UNHABITAT ku soo bandhigeysay mashaariicda gargaarka ah oo ay dalkeena ka wado wasiirka wasaarada caafimaadka xukaamada soomaaliya Xaawo Xasan Maxamed, safiirka soomaaliay u fadhiya dalkani kenya Jamaal Maxamed Xasan, qunsulka safaarada Cali Maxamed Sheekh Cali bagadi iyo xubno kale.
Hay’adda qaramada midoobay u qaabilsan dib u dajinta qaxootiga ee UNHABITAT oo muddo 17 sanno ah ka howl galeysay dalka soomaaliya ayaa shirka ku soo bandhigtay dad soomaaliyeed oo gudaha dalka ku barakacay oo ay dib u dajin u sameysay hay’adu,mashaariic dib u dhis oo ay ka fulisay qeybo kamid ah soomaaliya lacago ay ugu yaboohday dadka barakacayaasha ah ee gudaha dalka ku nool, iyo howlo kale oo gargaar iyo iyo dib u dajin isugu jiro oo ay ka fulisay qeybo kamid ah dalkeena,
Shirkan oo ka dhacay xarunta qaramada midoobay ee magaalada Nairobi ayaa waxaa gudoominayay madaxa hay’adda UNHABITAT Dr Joan Clos waxaana kasoo qeyb galay xubno ka socdo in ka badan 54 dowladood oo ay ku jiraan dowladaha deeq bixiyaasha.
Ugu horeyn Madaxa hay’adda UNHABITAT Dr Joan Clos ayaa ka jeediyay kulanka khudbad dheer oo uu kaga hadlaayay arrimaha samafalka iyo caaawinta dadka gudaha dalka ku barakacay oo ay soomaaliya ka wado UNHABITAT, kadibna waxaa aragtidooda ku aadan howsha ay soomaaliya ka qabato hay’adda la weydiiyay xubnihii ka socday dowladaha caalamka qaar kamid ah,iyagoo ugu hambalyeeyay hay’adda UNHABITAT caawinta dadka soomaaliyeed.
Wasiirka Caafimaadka ee xukuumada Soomaaliya Marwo Xaawo Xasan Maxamed oo hadal kooban ka jeedisay shirka ayaa tilmaamtay in ay muhiim ay tahay in dowlada soomaaliya ay la socoto howl walba oo ay dalka ka wadaan hay’adaha samafalka caalamka, iyadoo UNHABITAT uga mahad celisay sida ay ula wadaagtay dowlada wax yaabaha uga qabsoomay howlahooda.
Kulanka oo socday ku dhawaad 4 saacadood ayaa markii uu soo gababoobay waxaa si wada jir ah warbaahinta qaranka ula hadlay wasiirka caafimaadka Xaawo Xasan Maxamed iyo safiirka soomaaliya ee u fadhiya dalkani Kenya Jamaal Maxamed Xasan.
Ugu horeyna danjire Jamaal Maxamed Xasan ayaa warbixin dheeri ah ka bixiyay shirka ay UNHABITAT ku soo bandhigeysay howlaha ay ka qabatay dalka soomaaliya,isagoo sheegay in ay doonayeen in ay ogaadaan sida dalkeena wax uga qabato UNHBAITAT.
Marwo Xaawo Xasan Maxamed wasiirka caafimaadka xukuumada soomaaliya ayaa ka hadashay shirka ay magaalada Nairobi ay uga qeyb gashay iyo doorka ay dowlada soomaaliya ku leedahay la socodka howlaha ay dalkeena ka wadaan hay’adaha caalamka.
Wasiirka caafimaadka soomaaliya Xaawo Xasan Maxamed,safiirka dowlada soomaaliya u fadhiya kenya Jamaal Maxamed Xasan iyo qunsulka safaarada Cali Maxamed Sheekh Cali bagadi ayaa shirkaasi markii uu dhamaaday kadib waxa ay kulan gaar ah la yeesheen madaxda hay’ada qaramada midoobay u qaabilsan dib u dajinta qaxootiga soomaaliya Dr Joan Clos, iyagoo kala hadlaayay muhiimada ay leedahay in dowladda soomaaliya ay ka war heyso shaqo kasta oo ay gudaha dalka ka wadaan hay’adaha shisheeye,iyo sidii ay Hay’adda qaramada midoobay u qaabilsan u dib u dajinta qaxootiga u sii laba laabi lahayd howlaha samafalka ah oo ay gudaha dalka ka wado kuna balaariso dhammaan gobolada dalka soomaaliya.
Sawir qaade: Xasan Cumar Baffo
