Munaasabaddan ayaa lagu daah-furay ururka da’yarta arag la’aanta ah ee Soomaliyeed ee SOYAB, kaas oo ay muddo ku hamminayeen in ay sameystaan, waxaana ka qeyb-galay wasiirka Dhallinyarada iyo Ciyaaraha, xildhibaanno ka tirsan Barlamaanka Federaalka Soomaaliya, ururrada Haweenka Qaranka iyo kan gobolka, dhallinyarada Qaranka, bulshada qeybo ka socdey, waxaana soo diyaariyey munaasabadda Mustafa Sheekh Cali Dhuxulow oo ka tirsan mudaneyaasha Barlamaanka Soomaaliya.
Daah-furka ururka SOYAB, waxaa lagu soo bandhigay xubnaha hoggaamin doona sida C/raxmaan Jeynaani Maye oo 18, May indhaha loo fiiqay oo ah xog-hayaha ururka da’yarta aragga la’ iyo Amaal Cabdulaahi Axmed oo ah Xog-hayaha Arrimaha Dibedda ee ururkaasi, ayaa labaduba fikirkooda ku cabiray in ay u baahan yihiin garab istaag maadaama ay isku tashadeen, iyagoo codsaday in dowladda Soomaaliyeed iyo dadkeeda in ay taageeraan ururkooda.
Guddoomiyaha Guud ee Ururka da’yarta aragga la’a ayaa isagana ku baaqay in loo istaago sidii loola shaqeyn lahaa ururka Soyab oo u taagan sidii wax loogu qaban lahaa, xuquuqdoodana loogu heli lahaa dadka aragga la’a.
Guddoomiye ku xigeenka Ururka Haweenka Qaranka Soomaaliyeed iyo guddoomiyaha ururka Haweenka gobolka Banaadir, ayaa labaduba ugu baaqay wasaaradda Waxbarashada Soomaaliya in ay dabagal ku sameyso xarun waxbarasho oo madaxda sarre ee Qaranka ay amreen in loo baneeyo dhallinyarada baahiyaha gaarka qaba, bulshada ahaanna ay arrintaasi madaxdu warbixino uga geyn doonaan.
Xildhibaannada Sacdiya Careys Ciise, ayaa sheegtay in haweenka Barlamaanka Soomaaliya ka tirsan in ay si buuxda u taageeri doonaan dadka baahida gaarka qaba, gaar ahaan ururkan ay soo Hindiseen dhallinyarada aragga la’a.
Xildhibaan Mustafa Sheekh Cali Dhuxulow, ayaa uga mahadceliyey bulshada Soomaaliyeed sida ay isu taageeraan, gaar ahaan Mama Sahra oo ah hooyo Soomaaliyeed oo u istaagtay sidii dadka naafadaha ah iyo kuwa liita wax loogu qaban lahaa, isagoo ku baaqay in la xoojiyo is caawinta dadka Soomaaliyeed, maadaama ay lagu soo fool leedahay bisha Ramadaan.
Wasiirka Dhallinyarada iyo Ciyaaraha Xukuumadda Soomaaliya, Mudane Maxamed Xasan Nuux, ayaa sheegay in dadaal badan ay wasaaraddiisu ku bixin doonto sidii loo heli lahaa dhallinyarada baahida gaarka ah qaba oo ka mid noqda Shaqaalaha dowladda, isagoo xusay in Bisha Ramadaan in isaga iyo Xildhibaan Mustafa Dhuxulow ay ku yabooheen 5,000 oo dollar, loogu talagalay afurinta ardeyda aragga la’a.
Dhallinyarada aragga la oo inta badan wax bartay kuwa kalena ay weli wadaan, ayaa soo b andhiggay hammi ku saleysan wax wada qabsi kaddib markii ay dhiiragelin ka haleen dad Soomaaliyeed oo uu ka mid yahay Xildhibaan ka tirsan Barlamaanka Soomaaliya.
W/D:Feysal Muuse
