Munaasabadan lagu daah furayay xafiis ugu adeegi doono ururka ardayda Soomaaliyeed ee Uganda ayaa waxaa ka qayb galay Uqaybsanaha Waxbarashada Safaaradda Soomaaliya ee Uganda Mudane Liibaan Xuseen Deerow iyo madax kale.
Guddoomiyaha Ururka Ardayda Soomaaliyeed ee dalka Uganda Cabdimaajid Cabdiraxmaan Salaad ayaa uga mahadceliyay taageerada balaaran ee safaaradda Soomaaliya siisay ururka ardayda, si ay xafiiskan u furaan, isagoo si gaar ah uga mahadceliyay siihayaha Safaaraddda Mudane Cali Maxamed Maxamuud “Cali Cagabaruur”.
Guddoomiye Maajid ayaa ardayda Soomaaliyeed ee Uganda waxkabarata ugu hambelyeeyay xafiiskan cusub oo ardayda loogu adeegi doono.
Uqeybsanaha Waxbarashada Safaaradda Soomaaliya ee Uganda Liibaan Xuseen Deerow oo ka hadlayay munaasabadda ayaa sheegay in dadaal dheer lagu bixiyay in maanta la hirgeliyo xafiiskan oo ardayda u adeegi doona.
Liibaan ayaa sheegay in Safaaradda oo uu horkacayo Siihayaha Safaaradda Cali Cagabaruur ay uga mahadcelinayaan hirgelinta xafiiskan.
Ururka ardayda ayaa in muddo ah lahayn xafiis ay ku shaqeeyaan, si ardayda wax ugu qabtaan, waxaana muuqata in xiligan ay ardayda iyo safaaradda dadaal ku bixinayso sidii ururka iyo waxqabadkiisa loo horumarin lahaa.
