Ururuka dhaqaatiirta Soomaaliyeed oo kulan deg deg ah gelinkii ee maanta ku yeeshay Muqdisho ayaa magacaabay guddi ka kooban 10 xubnood oo Wasaaradda Caafimaadka ee dalka kala shaqeyn doona sidii looga hortagi lahaa in uu faafo cudurka coronavirus.
Dr Cusmaan Maxamuud Dufle oo ugu horeyn kulanka kaddib la hadlay Warbaahinta ayaa sheegay in kulanka ay isugu yimaadeen dhaqaatiirta loogana hadlay cudurka halista ah ee caalamka dhibaatada ku haya oo ay Soomaaliya wel wel ku heyso, kaasi oo si weyn looga dooday sidii arrintan xal loogu heli lahaa, maadaama uu cabsi weyn ku beeray bulshada.
Senator Cismaan Maxamuud Dufle oo ka mid ah Xildhibaannada Golaha Aqalka Sare ayaa tilmaamay kulanka sidoo kale looga hadlay qaabka uu cudurka ku faafo oo ay ugu horeyso qunfaca, hindhisada, gacan qaadidda qofka xanuunka qaba iyo sida looga hortagi karo xanuunkan.
Dr Dufle ayaa ugu baaqay hay’adaha Qaramada Midoobay ee dhanka caafimaadka qaabilsan in dowladda Soomaaliya laga caawiyo sidii looga hortagi lahaa caabuqa coronavirus oo hal kiis ka mid ah laga helay gudaha Soomaaliya, haatana la karantiilay muwaadinkii kiiskan laga helay.
Dr Maxamed Yuusuf Maxamuud oo ah guddoomiyaha ururka dhaqaatiirta Soomaaliyeed ayaa sheegay in hadafkoodu uu yahay sidii loo garab istaagi lahaa howsha adag ee ay hayso Wasaaradda caafimaadka, isla markaana la muujiyo isku duubni iyo ka wada shaqeynta sidii arrintan wax looga qaban lahaa.
“Shacabkeena marka ay isku duubnaadaan wax weyn ayay soo saari karaan, runtii wacyi gelin joogta ah ayaan sameyneynaa Insha Allah, guddi ayaan sameynay guddigaas si toos ah ayay ula shaqeyn doonaan Wasaaradda caafimaadka, Alle ha nagu garab galo howsha aan qabaneyno” ayuu yiri Guddoomiyaha ururka Dhaqaatiirta Soomaaliyeed.
