Munaasabad si heer sare ah loo soo agaasimay islamarkaana lagu xusayay maalinta macalinka Soomaaliyeed oo ku asteysan maanta oo ah 21 Novembar ayna soo qaban qaabiyeen ururka macalimiinta Soomaaliyeed ee magacooda loo soo gaabiyo SONUT ayaa lagu qabtay dugsiga hoose dhexe Cali Xuseen ee degmada Wadajir.
Xafladda xuska maalinta macalinka Soomaaliyeed waxaa ka qeybgalay mas’uuliyiin ka socotay hey’adaha taageera waxbarashada, Macalimiin, waalidiin, arday iyo martisharaf kale oo lagu casuumay.
Inti ay socotay munaasabadda ayaa laga jeediyay khudbado kaladuwan oo ahmiyadda lagu siinayay qiimaha macalinka Soomaaliyeed iyo sida loogu baahanyahay in la siiyo mudnaantiida, iyadoo hal kudhigga xuska maalinta macalinka ee sanadkan ay aheyd “Qiimeyn sii macalimiinta si ay u horumarto heerkooda” .
Sidoo kale waxaa goobta ka hadlay xoghayaha guud ee ee ururka macalimiinta SONUT C/qaadir Maxamed Jimcaale oo ku dheeraaday ka hadalka qiimaha uu macalinka Soomaaliyeed u leeyahay horumarinta waxbarashada dalka isagoo tilmaamay in an la soo koobi karin waxtarka iyo qiimaha macalinka Soomaaliyeed.
Sanad kasta maanta oo kale ayaa dalka oo dhan laga xusaa maalinta macalinka Soomaaliyeed oo ku asteysan 21-ka Novembar.
