Waaxda bilic soo celinta iyo nadaafadda gobolka Banaadir ayaa dardar gelineysa olole nadaafadeed oo ay ka sameyneyso degmooyinka caasimadda si loo helo magaalo qurux badan.
Agaasimaha guud ee bilic soo celinta iyo nadaafadda gobolka Banaadir mudane, Sharmaake Caddow Tuuryare ayaa sheegay in ay isku fureen waddooyin ay biyo xireen isla markaana ay wadaan dadaallo ay ku doonayaan in dib loogu soo celiyo bilicda dhammaan degmooyinka gobolka Banaadir.
Agaasimaha ayaa sheegay in ay wax badan ka qabteen degmooyinka Kaaraan, Yaaqshid, Boondheere, Wadajir iyo degmooyin kale isla markaana ay qorsheynayaan in degmo kasta oo ka tirsan Gobolka Banaadir ay isbuuciiba labo jeer ay ka sameyaan olole nadaafadeed si loo soo celiyo bilicdii caasimadda.
Agaasime Sharmaake ayaa shacabka ku dhaqan magaalada Muqdisho uga mahadceliyay sida wanaagsan ee ay ula shaqeeyaan Waaxda nadaafadda,isagoo ugu baaqay in ay sii laba laabaan taageeradooda.
