Dalalka Kuweyt, Imaaraadka Carabta iyo Baxrayn ayaa sheegay in ay taageerayaan bayaankii ka soo baxay Wasaaradda Arrimaha Dibadda Sucuudiga ee ku saabsanaa warbixinta Mareykanka ee ku aadaneed dilkii Jamaal Khashoggi.
Falcelinnadan lagu taageerayo bayaanka Wasaaradda Arrimaha Dibadda Sacuudiga ayaa daba socday markii la baahiyay warbixintii Koongareeska Mareykanka ee la xiriirtay dilka wariyahii u dhashay Sacuudiga ee Jamal Khashoggi kaasi oo 2018-kii lagu dilay Turkiga.
Wasaaradda Arrimaha Dibadda ee Kuweyt ayaa ku dhawaaqday in ay taageereyso bayaanka Wasaaradda Arrimaha Dibadda ee Sacuudiga, taasi oo la xiriirta warbixintii Koongareeska Mareykanka ee ku saabsaneed dilka Khashoggi.
Kuweyt ayaa xustay muhiimadda iyo doorka Sacuudi Carabiya, oo ay hoggaaminayaan Boqor Salmaan iyo Dhaxal-sugaha Boqortooyada Maxamed Bin Salmaan, ay ka cayaareen baaritaanka dilka Wariyaha.
Imaaraadka Carabta ayaa dhiniciisa taageeray bayaanka Wasaaradda Arrimaha Dibadda ee Boqortooyada Sacuudi Carabiya ee ku saabsan dilka wariye Khashoggi.
Wasaaradda Arrimaha Dibadda iyo Iskaashiga Caalamiga ee Imaraadka ayaa muujisay kalsoonida iyo taageerada ay u hayaan Hey’adaha garsoorka Sacuudiga, kuwaas oo xaqiijiyay sida Boqortooyada ay uga go’an tahay in lala xisaabtamaan dhammaan dadka ku lugta leh kiiskan.
Wakaaladda Wararka Baxreyn ayaa sheegtay, in Baxreyn ay muujisay taageeradeeda ku aaddan hadalkii Wasaaradda Arrimaha Dibadda ee Sacuudiga ee ku saabsanaa warbixintii loo gudbiyay Koongareeska Mareykanka ee ku saabsan dilka Khashoggi.
Baarlamaanka Carabtu ayaa dhankiisa sheegay in Mareykanka uu ku xad gudbay madaxbanaanida Boqortooyada Sacuudiga iyo madaxbanaanida garsoorkeeda, waxayna cadeeyeen inay taageersan yahiin bayaanka ay soo saartay Wasaarada Arimaha Dibada Boqortooyada Sacuudi Carabiya, ee la xariirtay warbixintii loo gudbiyay Koongareeska Mareykanka ee ku saabsaneed dilka Khashoggi.
