Magaalada Baydhabo ee xarunta ku meel gaarka u ah dowlad Goboleedka Koonfur Galbeed ayaa waxaa gaaray wafdi ka socda Wasaaradda Waxbarashadda, Hiddaha iyo Tacliinta sare ee Xukuumadda Federaaalka Soomaaliya oo maanta ka tagay magaalada Muqdisho ee caasimadda dalka.
Wafdigan ayaa waxaa horkacaya Agaasimaha guud ee Wasaaradda Waxbarashada Mudane Axmed Xasan Yuusuf, waxana safarka ku weheliya madax kale oo ka tirsan Wasaaradda, waxaana garoonka diyaaradaha Shaati Gaduud ee magaalada Baydhabo ku soo dhaweeyay Wasiirka Waxbarashada Maamulka Koonfur Galbeed Cabdiraxmaan Cismaan Malaaq kool kooliyow iyo xubno ka tirsan maamulka Koonfur Galbeed.
Xubnahan ka socda Wasaaradda Waxbarashadda ayaa magaalada Baydhabo uga qeyb gali doona shir wadatashi ah oo u dhexeeya Wasaaradda Waxbarashadda iyo Wasaaradaha waxbarashada dowlad goboleedyada dalka oo Baydhaba ka furaya, kaasi oo socon doono muddo saddex maalin ah, iyadoo shirka inta uu socdo looga hadli doonaa horumarinta waxbarashada dalka.
Wasiirka Waxbarashadda Soomaaliya Mudane Cabdulahi Goodax Barre ayaa maalinta beri ah gaari doona magaalada Baydhabo si uu ugu qeyb galo shirka u dhexeeya Wasaaradda Waxbarashada Soomaaliya iyo kuwa maamul Goboleedyada ee ka jira dalka.
