Sii-hayaha xilka Wasiirka Gaashaandhigga Soomaaliya Mudane Maxamed Sheekh Xasan Xaamud iyo wafdi uu horkacayo oo uu kamid yahay Sii-hayaha Wasiiru dowladlaha Arrimaha gudaha Maxamuud Macalim Yaxye ayaa gaaray degmada Tayeglow ee gobolka Bakool,ujeedada socdaalka Wafdigan ayaa ah in ay qalabeeyaan cutubyo ka tirsan ciidanka Xoogga dalka Soomaaliya oo dhowaan tababar loogu soo xiray degmadaasi.
Wafdiga ayaa waxaa ay kulan la yeesheen mas’uuliyiinta maamulka degmada iyo qeybaha bulshada ee halkaasi,iyagoo kala hadlay arrimo ay kamid yihiin xalinta dhibaatadii ka dhalatay haween dhowaan lagu laayay degmada Tayeglow.
Sii-hayaha Wasiirka Gaadhaandhigga Mudane Maxamed Sheekh Xaamud oo hadal u jeediyay askar ka tirsan Ciidanka qalabka sida ee Soomaaliya ayaa sheegay in dowladda Soomaaliya ay ka go’an tahay in ay mudnaanta koowaad siiyo Ciidamada qalabka sida ee dalka.
Sidoo kale mas’uuliyiinta wafdigan ayaa waxaa kamid ah xubo ka tirsan laanta Qaramada Midoobay u qaabilsan ka hortaga askareynta Carruurta kuwaas oo hubinaya in askarta dowladda Soomaaliya ay tababarto ay ku jiraan carruur iyo in kale.
