Wafdi uu hogaaminayo Madaxweynaha Dowlad Goboleedka Galmudug mudane Axmed Cabdi Kaariye “Qoor Qoor” oo maalmahan socdaal ku maraya deegaannada Galmudug ayaa maanta lagu soo dhaweeyay magaaada ganacsiga ah Guriceel ee Gobolka Galgaduud.
Madaxweynaha Galmudug waxaa socdaalkiisa ku wehliya Madaxweyne ku-xigeenka dowlad Goboleedka Galmudug mudane Cali Daahir Ciid, Wasiiro iyo Xildhibaanno waxaana markii ay soo gaareen Guriceel halkaasi ku soo dhaweeyay qeybaha bulshada ee magaalada, kuwaasi oo sitay boorar ay ku qornaayeen hal ku dhigyo ay ku taageerayaan Madaxda Galmudug iyo socdaalkooda la magac baxay socdaalka Nabadda oo ay ku soo kala bixinayeen deegaanno ka tirsan Gobolka Galgaduud.
Mudane Axmed Cabdi Kaariye “Qoor Qoor” oo bulshada la hadlay ayaa sheegay in ujeedka socdaalkooda ay la xiriirto sidii ay ugu kuur geli lahaayeen xaaladda dhabta ah ee ka jirta deegaannada Galmudug, ayna diyaar u yihiin inay wax badan ka qabanayaan cabashada bulshada ku nool Galmudug.
Madaxweynaha iyo Wafdigiisa ayaa inta ay ku suganyihiin magaalada Guriceel waxa ay kulamo la qaadan doonaan qeybaha bulshada oo ay ka dhageysan doonaan baahiyahooda gaarka ah.
