Wafdiga Wasaaradda Qorsheynta iyo Iskaashiga Caalamiga oo uu hoggaaminayo Mudane Cabdullaahi Sheekh Cali Qaloocow waxaa Garoonka Dayuuradaha Kuwait ku soo dhaweeyay Danjiraha Soomaaliya ee Dalka Kuwait Danjire Cabdulqaadir Amiin Sheekh oo ay wehliyan Lataliyaha Koowaad ahna Ku xigeenka Danjireha Mudane Abiib Muuse Faarax iyo Xoghayaha Koowaad ee Safaaradda.
Socdaalka Wafdiga Wasiir Ku Xigeenka Qorsheynta & Iskaashiga Caalamaiga ayaa waxaa ku wehlinaya qaar ka mid ah Agaasimeyaasha waaxyaha ee Wasaaradda, waxaana ay la xiriira ka qeybgalka Shirweynaha Sanadlaha ah ee Wadamada xubnaha ka ah Machadka Carbeed ee Arrimaha Qorsheynta kaas oo xaruntiisu tahay Caasimadda Kuwait.
Wafdiga Wasiirk Ku-xigeenka Mudane Prof. Qaloocow ayaa lagu wadaa inta ay joogan Dalka Kuwait in ay la kulmaan Madax kala duwan oo ka tirsan Dowladda Kuwait iyo Wafuud kale oo shirka ka soo qeybgaleysa. Sidoo kale, Wafdigu waxa uu kulan ballaaran la qaadan doona Jaaliyadda Soomaaliyeed ee Dalka Kuwait.
Danjiraha Soomaaliya ee Dalka Kuwait ayaa door muuqda ka qaatay xoojinta xiriirka labada Dal, taas oo ay daliil cad u tahay wafuuda tirada badan ee Soomaaliyeed ee muddo sanad ah gudeheeda booqday Kuwait, Wafuuda heerka sare ee sanadkii tagay booqday Kuwait waxaa kamid ah Wasiirka Difaaca oo uu wehliyo Taliyaha Ciidanka Xoogga, Wasiirka Arrimaha Dibadda, Wasiirka Maaliyadda, Wasiirka Ganacsiga, Wasiirka Warfaafinta, Wasiirka Caafimaadka, Wasiirka Shaqada & Arrimaha Bulshada, Xeer Ilaaliyaha Guud ee Qaranka iyo Dufcad Xeer Ilaaliyeyaal ah oo tababar xagga Qaanuunka ah ku qaatay Machadka Tababarada Adeega Garsoorka ee Dalka Kuwait.
