Wafdi uu hogaaminayo Wasiirka Cadaaladda ee Xukuumadda Federaalka Soomaaliya Mudane Cabdiqaadir Maxamed Nuur oo ay wehliyaan Wasiirka Howlaha Guud iyo Wasiiru dowlaha Maaliyadda dalka ayaa maanta gaaray magaalada Baydhabo ee xarunta Gobolka Baay.
Wafdiga ayaa waxaa garoonka diyaaradaha Baydhabo ku soo dhaweeyay madax ka tirsan dowlad Goboleedka Koonfur Galbeed Soomaaliya, waxaana ujeeddada mas’uuliyiinta ay u tegeem magaalada Baydhabo ay tahay inay xarig ka jaraan xabsiga weyn ee Magaalada oo si casri ah loo dhisay.
Xabsiga Magaalada Baydhaba ee gobolka Baay inta aan dayactirkaan lagu sameyn maxaabiista ku jirtay waxaa ku haystay dhibaatooyin aad u badan, balse juhdiga dowladda Soomaaliya ay galisay ayaa wax badan ka badali doonta Nolosha Maxaabiista ku xiran iyo kuwa lagu xeri doono intuba, maadaama si casri ah loo dhisay oo ay maxaabiista ka heli doonaan adeegyada ay u baahanyihiin.
