Guddoomiyaha Hay’adda Batroolka Soomaaliyeed Injineer Cabdulqaadir Maxamuud Aadan oo ay wehliyeen howlwadeeno ka tirsan hay’adda, Maamulka Dagmada Hobyo, Ganacsato iyo saraakiisha ciidamada Booliska iyo Nabadsugida ayaa maanta koormeer ku tagay qaar ka mid ah deegaannada ku yaala xeebaha degmada Hobyo kuwaas oo ka mid ah meelaha ay ka socdaan sahminta Shidaanka.
Mas’uuliyiinta ka socotay Hay’adda Batroolka Soomaaliyeed ayaa intii kormeerkooda ay ku guda jireen waxa ay warbixinno la xariira halka ay mareyso shaqada sahminta Shidaalka iyo qorshayaasha la xariira ay la wadaageen Mas’uuliyiinta maamulka Dagmada Hobyo iyo bulshada qeybaheeda kala duwan ee ku sugan deegaan xeebeedyada ay kormeerka ku tageen iyagoo dhanka kalana ujeediyay wacyi galin la xiriirta ilaalinta deegaanka, ka faa’ideeysiga kheyraadka iyo fursadaha kale ee ku xeeran marka dhawaan lagu guuleeysto sahminta iyo soo saarista Shidaalka.
Guddoomiyaha degmada Hobyo Cismaan Axmed Cabdulle oo uu wehliyo guddoomiye ku-xigeenka dagmada Mukhtaar Cabdullaahi Maxamed ayaa ugu horeyn ka hadlay ahmiyada ay degmada iyo deegaannada ku xeeran u leedahay kormeerka iyo qorshaha baarista Shidaalka.
Guddoomiyaha Hay’adda Batroolka Qaranka Injineer Cabdulqaadir Maxamuud Aadan ayaa ugu dambeyn ka warbixiyay ujeedka kormeerkooda iyo xeebaha ay kormeerka ku tageen ahmiyadda ay u leeyihiin sahminta Shidaalka.
