Wafti uu hoggaaminayo Wasiir Kuxigeenka Wasaaradda Boostada iyo Isgaarsiinta Mudane Jamaal Xasan Ismaaciil ayna weheliyaan agaasimaha Guud ee wasaaradda Axmed Xaaji Cabdi iyo Madaxa Mashruuca Taakuleynta Isgaarsiinta (ICT) Maxamed Cabdi Waare ayaa gaaray magaalada Baydhabo ee xarunta KMG ah ee Dawlad Gobolleedka Koonfur Galbeed.
Waftigan oo uu weheliyay wasiirka Boostada iyo Isgaarsiinta ee Dawlad gobolleedka Koonfurgalbeed Maxamed Cumar Saytuun ayaa markii ay soo gaareen garoonka Baydhabo waxaa loo gudbiyay hoyga madaxtooyada waxaana qaabilay madaxweynaha Dawlad Goboleedka Koonfurgalbeed Mudane Shariif Xasan oo uga mahadceliyay madaxda wasaaradda iney mudnaan soo siiyeen maamulka K/Galbeed ayna ka bilaabeen safarkooda.
Waftigan ayaa waxey kormeer ku tageen xarumaha wasaaradda Boostadu ku lahayd magaalada Baydhaba iyo Afar jaamacadood oo ku yaalla magaalada Baydhaba halkaasoo ay kula kulmeen masuuliyiinta jaamacadaha ayna ka dhageysteen warbixino la xariira waxbarashada jaamacadaha iyo awoodda adeegga Internetka ee ay jaamacadahani heystaan.
Wasaradda Boostada iyo Isgaarsiinta ayaa wadda qorshe balaaran oo ay ku tala jirto iney gaarsiiso adeegyada wasaaradda dhamaan gobollada dalka waxaana wasaaradda u qorsheysan iney booqdaan dhamaan caasimadaha dawlad gobloleedyada dalka.
Markii uu soo dhamaadey kormeerku ayaa waxaa saxaafadda la hadley wasiir Kuxigeenka Wasaaradda Mudane Jamaal Xasan Ismaaciil oo ka warbixiyay ujeedada safarka iyo qorshaha wasaaradda ee sanadka 2016 isagoo sheegey inay ku faraxsan yihiin inay Baydhabo soo gaareen ayna kormeereen xarumihii wasaaradda iyo jaamacadaha ku yaalla magaalada Baydhaba.
Agaasimaha Guud ee wasaaradda oo saxaafadda la hadley ayaa isna sheegey in wasaaradda Boostada iyo Isgaarsiinta DFS ay go’aansatay iney adeegga wasaaradda la gaarsiiyo dalka oo dhan ayna muhiim tahay in wasaaradda iyo wasaaradaha dawlad gobolleedyadu isku xirmaan ayna wada shaqeeyaan. 17 kii bishan December ayay ahayd markii ay wasaaradda Boostada iyo Isgaarsiinta Dawladda
dhexxe ay shir u qabatay dhamaan wasiirada dawlad gobolleedyada iyo gobollada aan wali dhismin si ay ula wadaagaan waxqabadka iyo qorshaha wasaaradda isla markaana ay wada tash u ga sameeyaan xeerka Isgaarsiinta.
Xeerka Isgaarsiinta Qaranka oo kamid ah xeerarka ugu muhiimsan ayaa horyaalla baarlamaanka waxaana lagu wadaa in dhawaan la meelmariyo.
