Waxaa Magaalada Muqdisho ku soo gebageboobey Shirka 4-aad ee Wadatashiga Wasaaradda Isgaarsiinta iyo Teknolojiyadda ee Xukuumadda Federaalka Soomaaliya iyo Wasaaradaha Isgaarsiinta ee Dowladaha Xubnaha ka ah Dowladda Federaalka iyo Gobolka Benaadir oo socdey 12ka illaa 16ka Juun 2023.
Shirkan oo ay soo qabanqaabisay Wasaaradda Isgaarsiinta iyo Teknolojiyadda Soomaaliya ayaa waxaa si rasmi ah u furay, soona xiray Wasiirka Isgaarsiinta iyo Teknolojiyadda ee Xukuumadda Federaalka Soomaaliya.
Ujeedada shirkani waxay ahayd in Wasaaradaha isku shaqada ah ee heer Federaal iyo dowladaha xubnaha ka ah Dowladda Federaalka Soomaaliya ay yeeshaan wadashaqayn iyo is-afgarad, waxaana ka soo qaybgalay Wasiirka Wasaaradda Isgaarsiinta iyo Teknolojiyadda Xukuumadda Federaalka Soomaaliya Mudane Jaamac Xasan Khaliif, Wasiiru-dowlaha Wasaaradda Mudane Axmed Cismaan Diiriye, Wasiirka Isgaarsiinta iyo Teknolojiyadda ee Koonfur Galbeed, Mudane Cabdulaahi Sheekh Daahir, Wasiirka Isgaarsiinta iyo Teknolojiyadda ee Galmudug Mudane Muxyadiin Sheekh Cabdullaahi/llaahi Cismaan, Wasiirka Isgaarsiinta iyo Teknolojiyadda ee Hirshabeelle, Mudane Cabdifitaax Xasan Faarax, Agaasimaha guud ee Wasaaradda Isgaarsiinta iyo Teknolojiyadda ee Jubbaland, ahna kusimaha Wasiirka Mudane Saacid Cabdullaahi Maxamed , Agaasimaha Guud ee Wasaaradda Isgaarsiinta iyo Teknolojiyadda Soomaaliya Mudane Cabdicasiis Duwane Isaaq, Maareeyaha Hay’adda Isgaarsiinta Qaranka Mudane Mustafa Yaasiin Sheekh, Agaasimaha Waaxda Teknoolajiyadda iyo Isgaarsiinta ee Gobolka Benaadir Maxamed Cabdiraxmaan Yabarow, Lataliyeyaasha Wasaaradda Isgaarsiinta, Agaasimayaasha guud iyo Agaasime Waaxeedyada Wasaaraddaha Isgaarsiinta ee heer Federaal iyo heer dowlad goboleed, lataliyeyaal iyo hawlwadeenno kale.
Falanqayn iyo dood dheer ka dib waxaa Shirka 4-aad ee Wadatashiga laga soo saaray qodobadan hoos ku xusan:
1.Waxay Wasaaraddaha dowladaha xubnaha ka ah DFS uga mahadceliyeen Wasaaradda Isgaarsiinta iyo Teknolojiyadda (WI&T) kulankan wadatashiga ah waxayna soo jeediyeen in la joogteeyo kulamada nuucan oo kale ah.
2.Waxay Wasaaraddaha dowladaha xubnaha ka ah DFS ku bogaadiyeen horumarka Wasaaradda Isgaarsiinta iyo Teknolojiyadda (WI&T) ay ku tallaabsatay muddada kooban iyo howlaha qabsoomay.
3.Wasaaradda Isgaarsiinta iyo Teknolojiyadda Xukuumadda Federaalka Soomaaliya iyo Wasaaradaha xubnaha ka ah in ay yeeshaan wadashaqeyn joogto ah, lagana faa’iideysto dhammaan howlaha hor-yaalla.
4.In Mashaariicda iyo dhammaan Horumarka la hiigsanaayo laga wada shaqeeyo sida:- Mashruuca (EA-RDIP) oo maraya meel wanaagsan.
