Wasiiradda Warfaafinta DFS iyo Dawlad Goboleedyada ayaa maanta kulan la yeeshay Madaxda Warbaahinta gaarka loo leeyahay iyo Madaxda Bulshada Rayidka ee Soomaaliya sida Ururada Warbaahinta, Culimada, Salaadiinta, Madaxda Jaamacadaha, dhalinyarada IWM waxayna kala hadleen wacyigelinta Bulshada iyo ku garab istaaga Dawladda difaacida Nolosha, sharafka, karaamada, Midnimada iyo Qaranimada Soomaaliya.
Ujeedka ka qeybgalka bulshada rayidka ee shirkan ayaa ahaa sidii looga wadatashan lahaa habkii si wadajir ah looga qeyb qaadan lahaa wacyigelinta bulshada.
Ka qeyb galeyaasha shirka ayaa wasiirrada ka dhageystay warbixinno ku saabsan wacyigelinta qaranka iyo qorshayaasha dowladda, iyagoo la wadaagay talooyin iyo tusaalooyin ay u soo jeediyeen dowladda gaar ahaan wasaaradaha warfaafinta heer federaal iyo dowlad-goboleed.
