Xaflad si heer sare ah loo soo agaasimay oo ay ka soo qayb galeen mas’uuliyiinta Warshada cabitaanada Soda King iyo shirkadda cabitaanada ee Al-irshaad ee fadhigeedu yahay Puntland ayaa maanta lagu qabtay hoolka shirarka ee warshadda Soda King magaalada Muqdisho, ugu horeynta waxaa halkaas ka hadlay maamulaha warshada Soda King Ahmed Sh. Yusuf Guled isagoo sheegay in heshiiskani yahay mid muujinaya is dhax-galka iyo wada shaqeynta ganacsatada Soomaaliyeed, mas’uuliyiinta Al-Irshad waxay nooga yimaadeen goballo fog-fog si u xaqiijiyaan heshiiskan, waxaan ku rajo weynahay in uu noqon doono mid wax weyn u tari doona labada shirkadood iyo guud ahaan horumarka dalka.
Waxaa isna halkaas ka hadlay maamulaha shirkda Al-irshaad, Xirsi Cabdulqadir (Alle Macadaabe) kaas oo sheegay in sababaha ay Muqdisho ay u yimaadeen tahay in ay saxiixayaan heshiiskan, waa waajib in aa dhiiri gelino wax soo saarka dalkeena Soomaaliya, labadii bilood ee la soo dhaafay ayaan cabitaanada Soda King iyo Aqua King ku iibinaynay magaalooyinka Puntland, waxaa aad u soo dhaweeyay kana helay shacabka ku dhaqan gobaladaas, waa cabitaan 100% ka tayo wanaagsan kan dibadda laga keeno, waxaan dooranay in aan joojino dhamaan cabitaanadii dibada aan ka keeni jirnay, aad ayaan ugu faraxsanahay in aan noqono wakiilka Soda King ee Puntland.
Qodobadda heshiiskan ayaa waxaa ka mid ah in shirkada Al-Irshaad ay gayn doonto gobalada Puntland 10,000 kartoon cabitaan ah bil kasta, iyadoo hal sano kadibna warshada Soda King ay Puntland ka furi doonto warshad labaad oo soo saari doonta cabitaanada Soda King iyo Aqua King, labada shirkadood ayaa hada sii bilaabay cilmibaarista warshada Soda King ee Puntland waxaana warshadaas wada lahaan doona ganacsatada labada dhinac.
Gabo-gabadii munaasibada ayaa waxaa Maamulaha Soda King Ahmed Guled gudoonsiiyay Maamulaha shirkada Al-Irshad shahaadada loo yaqaan “Authorized Distributor Certificate” ee Puntland
