Wasaaradda qorsheynta iyo iskaashiga caalamiga ah ee xukuumada Soomaaliya ayaa maanta Bangiga aduunka magaalada Nairobi kula saxiixatay heshiis ay isaga kaashanayaan xog aruurin sahan ah oo lagu ogaanayo heerka nolosha ee dhaqaale iyo mida bulsho oo ay ku noolyihiin shacabka Soomaaliyeed.
Wafdi uu hogaaminayo wasiir ku xigeenka wasaarada qorsheynta iyo iskaashiga caalamiga ah ee xukuumada Soomaaliya Prof C/laahi Shiikh Cali (Qaloocow) oo ay ka mid ahaayeen xoghayaha joogtada ah ee wasaarada qorsheynta Cabdi Ciise Diirshe iyo agaasimaha guud ee agaasinka Istaatiistikada Axmed Cilmi Muxumed ayaa sedaxdii maalin ee la soo dhaafay kulamo la lahaa mas’uuliyiinta Bangiga aduunka.
Wasiir ku xigeenka wasaarada qorsheynta iyo iskaashiga caalamiga ah ee xukuumada Soomaaliya Prof C/laahi Shiikh Cali (Qaloocow) ayaa sheegay in Ahmiyadda heshiiskan ay la saxiixdeen Bangiga aduunka ay tahay in la helo macluumaad rasmi ah si dawladdu go’aan uga qaarto qaabka iyo sida loo fulin karo mashruucyada lagu kobcinaayo dhaqaalaha iyo howlaha lugu xoojinayo kaabayaasha dhaqaalaha ee dalka.
Wasiir ku xigeenka ayaa intaasi ku daray in Sahankan uu hordhac u yahay mid weyn oo dalka oo dhan ay Wasaaraddu sameyn doonto.
Wasiirka qorsheynta iyo iskaashiga caalamiga ah C/laahi Shiikh Cali (Qaloocow) ayaa sidoo kale sheegay in wafdiga uu hogaaminayo ay kulan la qaateen Deeqbixiyaasha iyo Hay’daha caalamiga ah,waxaana kulankaasi looga tashanayay sidii Wasaaradda Qorsheynta iyo Iskaashiga Caalamiga looga taageeri lahaa dhinaca xog aruurinta, farsamada xog falaqeynta iyo soo saarista xogaha ku saleysan cilmi baaris rasmi ah.
