Wasaaradda Amniga Galmudug ayaa maanta magaalada Gaalkacyo ka daahfurtay tababar lagu kobcinayo aqoonta, xirfadaha iyo wada-shaqaynta guddiyada iskaashiga Booliiska iyo bulshada ee heer degmo iyo heer xaafadeed.
Guddiyadan oo la dhisay sanadkii hore ayaa tababarkan loogu talagalay in lagu xoojiyo awooddooda iyo wada-shaqaynta ay la leeyihiin hay’adaha amniga, si ay si hufan uga qayb qaataan sugidda amniga, nabadgelyada iyo bedqabka bulshada.
Guddiyadu waxay si gaar ah uga shaqayn doonaan xaafadaha iyo deegaannada ka fog adeegyada dowladda, iyagoo door muhiim ah ka qaadanaya isku xirka bulshada iyo laamaha amniga, ka hortagga dhibaatooyinka amni iyo xoojinta nabadda magaalada Gaalkacyo iyo nawaaxigeeda.
Tababarkan ayaa qayb ka ah dadaallada Wasaaradda Amniga Galmudug ay ku horumarinayso wada-shaqaynta Booliiska iyo bulshada, si loo helo bulsho amni ahaan isku tashata oo si dhow ula shaqaysa hay’adaha dowladda.
