Wasiirka Wasaaradda Arrimaha Dibadda iyo Iskaashiga Caalamiga, Mudane Danjire Axmed Ciise Cawad, Wasiiru dowlaha Mudane Cabdulqaadir Axmed-kheyr Cabdi , Xoghayaha joogtada Wasaaradda Mudane Danjire Maxamed Cali-Nuur Xaaji, Agaasimayaasha Waaxyaha, Safiirrada, Qunsulada Guud , Lataliyeyaasha Wasaaradda iyo dhammaan Saraakiisha Wasaaradda Arrimaha Dibadda iyo Iskaashiga Caalamiga waxa ay tacsi u dirayaan ehellada, asxaabta iyo ummadda Soomaaliyeed geerida ku timid Allah u naxariistee Danjire Maxamed Cumar Jaamac Ismaaciil (Dhigic dhigic) oo noqday Wasiirkii Ganacsiga ee Soomaaliya iyo Safiir hore oo habeennimadii Isniinta, 6 April, 2020 ku geeriyooday Magaalada Toronto ee dalka Canada.
Marxuum Maxamed Dhigic dhigic oo Qaranka Soomaaliyeed ugu adeeggay si daacadnimo oo nafhurnimo leh muddo ku dhow 23 sano, ayaa 15 sano ka mid ah ka shaqeynayay howlaha diblomaasiyadda, isagoo mar noqday Guddoomiyaha Bankiga Horumarinta Soomaaliya, waxaa kadib dhammaadkii todobaadtanaadkii loo magacaabay Safiirka Soomaaliya ee Dalka Biljimka, afar sano kadib abaarihii sanadkii 1981 waxaa loo magacaabay Wasiirka Ganacsiga, muddo sanado kadib waxaa dib loogu magacaabay inuu Safiir ka noqdo isla dalka Biljimka, isagoo lagu xusuusto kaalinta mudnaanta leh ee uu ka qaatay xoojinta xiriirka Soomaaliya iyo dalka Biljimka iyo guud ahaan wadamada Yurub.
Danjire Maxamed Cumar Jaamac Ismaaciil (Dhigic dhigic) waxa uu tan iyo qaran burburkii dowladdii dhexe ee Soomaaliya uu ku noolaa dalka Canada, isagoo kaalin muhiim ah oo muuqata ka qaatay yagleelidda iyo dhidiba u taagidda Dowlad Goboleedka Soomaaliyeed ee Puntland sanadkii 1998, isagoo ka mid ahaa aqoonyahankii iyo indheergaradkii ka soo jeedday deegaannadaasi ee dib ugu soo laabtay dalka si maamul goboleedkaasi ugu saldhigaan.
Haddaba, annagoo ka murugeysan, kana tiiraanyeysan geerida Marxuumka, ayaa waxaan Allah uga baryeynaa inuu u naxariisto, qabrigiisana nuur iyo neecaaw udgoon ku siiyo, hoygiisana ka dhigo Jannada sare ee Alfardows, qoyskiisa, ehelladiisa iyo asxaabtiisana samir iyo iimaan ka siiyo – Aamiin.
INNAA LILLAAH WA INNAA ILEYHI RAAJICUUN
