Wasaaradda arrimaha Gudaha Xukuumadda Federaalka Soomaaliya ayaa daahfurtay shir looga hadlayo dib u yagleelidda nidaamka diiwaangelinta madaniga ah ee Muwaadinka.
Shirkan oo ay soo qaban qaabisay Wasaaradda Arrimaha gudaha, Federaalka iyo dib u heshiisiinta ee Xukuumadda Soomaaliya ayna ka qeyb galeen Wakiilo ka kala socotay Wasaaradaha Cadaaladda iyo Diinta ee Federaalka, xuno ka socday Wasaaraadaha arrimaha gudaha dowlad gobaleedyada, Madax ka tirsan hay’adda Istaraatiijiyadda Qaranka, Maamulka gobalka Banaadir, ururrada bulshada rayidka iyo mas’uuliyiin kale ayaa waxaa looga hadlayay dib u yagleelidda Nidaamka diiwaangelinta madaniga ah, taasi oo muhiimad gaar ah u leh bulshada Soomaaliyeed.
Agaasimaha Guud ee Wasaaradda Arrimaha Gudaha, Federaalka iyo dib u heshiisiinta ee Xukuumada Soomaaliya Mudane Saciid Cabdulaahi Calasow ayaa tilmaamay in Wasaaraddu ay qaadatay in dib loo soo celiyo Nidaamka diiwaangelinta dadweynaha, si loo helo macluumaadka qofka.
Wasiirka Arrimaha Gudaha ee Dowlad Goboleedka Hirshabelle Maxamed Cali Caadle ayaa tilmaamay in nidaamkan muwaandinku uu ku helayo wakhtiga dhalashadiisa, ayna kala shaqeyn doonaan Wasaaradda Arrimaha gudaha ee Federaalka, si loo gaarsiiyo deegaanannada maamulkaas.
Wasiiru dowlaha arrimaha gudaha maamul gobaleedka koonfur galbeed Cabdimaalik Ibraahim Cabdulle, ayaa dhankiisa xusay in ay muhiimtahay in la helo qorshe suura galinaayo in si sax ah loo diwaan galiyo dadweynaha, si dib loogu soo celiyo nidaamyada diwaan-galinta xogta shacabka Soomaaliyeed.
Wasiiru dowlaha arrimaha Gudaha, Federaalka iyo dib-u-heshiisiinta Xukuumadda Federaalka Soomaaliya Mudane Aadan Cabdinaasir oo furay shirka ayaa tilmaamay in muhiimad gaar ah u leeyahay Bulshada Soomaaliyeed, lana helo doono xog dhameystiran oo bulshada ku saabsan.
Shirka oo soconayo muddo labo cisho ah ayaa la filayaa in gaba gabadiisa laga soo saaro macluumaad dhameystiran oo ku saabsan hanaanka loo wajahayo Nidaamka diiwaangelinta dadweynaha.
