Agaasimaha Guud ee Wasaarada Awqaafta iyo Diinta Sheekh Kheyroow Aadan oo si toos ah Bulshada uga hadlayay Warbaahinta Qaranka ayaa sheegay in maalinta beri ay tahay maalin ciid ah, isla markaana Ummadda ugu hambalyeeyay bilasha 1-da bisha Shawaal.
Sheekh Cabdinaasir oo ka mid ah culimada Soomaaliyeed, kuna sugan magaalada Laascaanood ayaa sheegay in magaalo 100 km u jirta laascaanood lagu arkay bisha, isla markaana ay wareysteen oo uu xusay inay yihiin dad lagu kalsoonyahay.
Sidoo kale muwaadin kale oo ku sugnaa gobolka Shabeelaha Hoose ayaa sheegay in 11 qof oo uu ku kalsoonyahay ay arkeen bisha, isla markaana ay tahay maalin ciid ah beri oo jimco ah.
Sheekh Bashiir Axmed Salaad Guddoomiyaha hay’adda Culimada Soomaaliyeed ayaa sheegay in culimada xiriiro kala duwan oo ay sameeyeen ay u cadaatay in beri ay tahay maalin ciid ah.
Muwaadin kale oo bare ah iskuul ku yaalla degmada Kaaraan ayaa sheegay in u arkay bisha, isla markaana markii uu arkay ay u suurta gashay in uu tusiyo ilaa iyo lix qof oo kale , si ay xaqiiqsadaan aragta bisha.
Agaasimaha guud ee Wasaaradda Awqaafta ayaa xusay in Wasaaradda oo kaashaneysa culimada Soomaaliyeed ay beri tahay 1-da bisha Shawaal oo ah maalinta ugu horeyso ciidul fidriga, isagoo bulshada uga digay in waxyaabaha ka baxsan shareecada ay ku soo dhaweeyaan bilasha bisha Shawaal.
Guddoomiyahay Hay’adda Culimada Soomaaliyeed Sheekh Bashiir Axmed Salaad ayaa isna dhankiisa Ummadda ka codsaday inay ka faa’iideystaan tukashada ciida, isla markaana si Islaami ah loogu ciido, lana joojiyo bandhig faneedyada lagu soo dhaweynayo ciidda.
Sheekh Yuusuf Cali Ceynta Guddoomiyaha Majmaca Soomaaliyeed ayaa shacabka u sheegay in salaadda ciida loo soo deg dego, isla markaana qofka Muslimka ah jidka uu ku yimaado Masjidka jid aan ahayn uu ku laabto, taasi oo uu ku tilmaamay in ay wadato ajir fara badan.
Sheekh Cali Maxamuud (Sheekh Cali Dheere) ayaa xusay in aragtida bisha ay Wasaaradda iyo culimada la wadeegeen bulsho badan oo ay khadka si toos ah u soo geliyaan, waxaana uu hambalyo u diray Ummadda Soomaaliyeed.
