Mas’uuliyiinta Wasaaradda Beeraha iyo Waraabka Soomaaliya, sharci yaqaano dhanka beeraha ah iyo qubaro ayaa ka qeyb galay kulanka oo u jeedkiisu ahaa ka tashiga qaabka ay u howlgali doonto hey’adda adeegyada baaritaanka Beeraha iyo sharciyeynta beeraha Soomaaliyeed oo ay horey u meelmariyeyn Xildhibaanada Golaha shacabka.
Ka qeyb galaayasha kulanka ayaa si qoto dheer uga hadlay muhiimadda hey’adda adeegyada baaritaanka Beeraha iyo sharciyeynta beeraha Soomaaliyeed, taas oo saldhig u ah la socodka badqabka iyo tayada cunooyinka dalka soo gala iyo kuwa ka baxa xakameynta iyo kor u qaadidda tayada abuurka, ka shaqeynta sugnaanta cuntada iyo kobcinta wax soo saarka beeraha.
Agaasimaha qorsheynta iyo siyaasadda ee Wasaaradda Beeraha Soomaaliya Maxamuud Yaasiin Cartan ayaa sheegay in sharcigan oo ay meel mariyeen Golaha Wasiirada iyo golaha Shacabka, ay doonayaan in sida ugu dhaqsiyaha badan ay u dhaqan geliyaan.
Wasiirka Beeraha iyo Waraabka Soomaaliya Saciid Xuseen Ciid oo kulanka furay ayaa sheegay in Hey’adda Adeegyada Baartitaanka iyo Sharciyeynta Beeraha Soomaaliyeed ay muhiim u tahay bulshada Soomaaliyeed, loona baahanyahay in shacabka ay ka faa’iidyestaan.
