Wasaaradda Beeraha iyo Waraabka ee Xukuumadda Federaalka Soomaaliya ayaa maanta oo ay taariikhdu tahay 19 June 2021 ku qabatay magaalada Muqdisho shirka Ansixinta Siyaasadda Qaran ee fidinta Beeraha oo ay ka qeyb-galeen Madax ka socotay Wasaaraddaha Beeraha dowlad Goboleeyada dalka iyo quburo ku xeel dheer arrimaha Beeraha.
Agaasimaha Waaxda Waxsoo saarka Wasaaradda Beeraha Maxamed Muuse Aadan iyo Agaasimaha guud ee Wasaaradda Beeraha Jubbaland Maxamed Mursal Xersi ayaa sheegay in siyaasadda ay kor u qaadeyso wax soo saarka dalka, lana heli doono siyaasad Qaran oo wax badan u tari doonto bulshada.
Agaasimaha guud ee Wasaaradda Beeraha iyo Waraabka Dowladda Federaalka Soomaaliya Nuur Yuusuf Nuur ayaa sheegay in Wasaaraddu ay ka shaqeyneyso soo celinta siyaasadihii lagu hagi jiray beeraha iyo kuwa kale oo horleh, isagoo xusay in siyaasadda Qaran ee fidinta Beeraha ay soo martay heerar kala duwan.
Wasiir ku-xigeenka Wasaaradda Beeraha iyo Waraabka ee Xukumadda federaalka Soomaaliya Mudane Xaamud Cali Xasan ayaa sheegay in saddex xarumood laga furay magaalooyinka Jowhar, Baydhabo iyo Buulo gaduud oo hoostagta magaalada Kismaayo, waxaana dhamaan loogu talagalay in dib loo soo celiyo siyaasadda fidinta Beeraha, ayna kor joogteyn doonaan xarumahaasi ay ka hirgeliyeen qaar ka mid ah dowlad Goboleedyada qeybta ka ah dowladda Federaalka.
