Ku simaha wasiirka ahna Wasiir ku xigeenka wasaaradda beeraha xukuumada federaalka ah ee Soomaaliya mudane Cabdicasiis Saalax Carmaan oo maanta xafiiskiisa kula hadlay Warbaahinta Qaranka Soomaaliya ayaa waxaa uu faah faahin ka bixiyay waxqabadka wasaaradda todobadii bilood ee ay xafiiska joogeen isaga iyo wasiirka wasaaradaas Axmed Xasan Gaboobe.
Mr Carmaan ayaa waxaa uu sharaxay dadaalada wasaaradu ku bixisay kobcinta iyo garab istaaga beeraleyda sidoo kale wax ka qabashada fatahaadaha gobolada qaar ka dhaca xiliyada roobka taas oo uu sheegay in hadda kadib aysan dhici doonin sida qorshuhu yahay.
Ku simaha wasiirka ayaa waxaa uu xusay in wasaaradu ay talaabo horay u qaaday todobadii bilood hadana qorshaha dhaw ee wasaarada uu yahay in dib u dhis lagu sameeyo xaruntii wasaaradda beeraha iyo xarumo kale sidoo kalena la tayeeyo shaqaalaha wasaaradda.
“Waxa ugu horeeya ee hadda noo qorsheysan waxaa waaye in xaruntii wasaaradda aan dayactirno si wasaaradu ugu shaqeyso waayo hadda ciriiri ayaan ku shaqeynaa ani ahaan gadaal ayaan ka riixaa arintaas dowladda Imaaraadka ayaa noo balan qaaday in ay noo dhiseyso” ayuu yiri wasiirka .
Cabdicasiis Saalax Carmaan wasiir ku xigeenka wasaaradda beeraha ayaa dhanka kale waxaa uu carabka ku adkeeyay in ay jiraan ENG-yo gacanta kula jira shaqada wasaarada ee la xiriira dhanka beeraha waxaana uu baaq ah in ay ka waantoobaan u diray hay’adahaas.
“Runtii waxaa jira ENG-yo shaqadii wasaarada faraha kula jira dhowr jeerna waan uga dignay in ay joojiyaan shaqadaas hadda waxaan anoo ka faa,iideysanaya fursadaan baaq dheer ku leeyahay ka waantooba howshaas oo iska soo diiwaan galiya wasaaradda”ayuu yiri Carmaan.
Wasaaradda beeraha xukuumadda Soomaaliya oo ka mid ahayd xili wasaaradaha ugu wax soo saarka badan dalka xarumo badana ku lahayd dalka qaybo badan oo ka mid ah ayaa hadda ku shaqeysa xarunta wasaaradda Ganacsiga waxaana ay ka mid tahay wasaarado badan oo bur burkii saameeyay walina aan ka soo kabsan in kastoo dadaalku uu socdo.
