Injineero ka tirsan wasaaradda Boostada iyo Isgaarsiinta ayaa waxey ka qaybgalayaan tababar ka dhacaya dalka Masar kuna saabsan diyaarinta iyo xiritaanka internet-ka dheereeya (Fibre Optics).
Tababarkani oo ay iska kaashanayaan wasaaradda Isgaarsiinta ee dalka Masar iyo hay’adda Isgaarsiinta Caalamka ee ITU ayaa waxaa ka qayb qaadanaya 11- waddan oo Afrikaan ah oo ay Soomaaliya ka mid tahay waxaana waddan walba uga qaybgalaya 2 Injineer. Waddamada tababarkan ka qaybqaadanaya ayaa kala ah Sudan, Ereteria, Uganda,Tanzania, Zambia, Malawi, Namibia, Brundi, Nigeria, K/Suudan iyo Somalia.
Wasaaradda Boostada iyo Isgaarsiinta ayaa tababarkani u dirtey Agaasimaha Teknoolajiyada (ICT) Eng. Cali Afey iyo Madaxa maamulka Sumadda Qaranka (SONIC) Eng. Zakariye Ismaaciil. Tababarkan oo soconaya muddo 20 maalmood ah ayaa lagu wadaa in Injineerada ka socda Wasaaradda Boostada iyo Isgaarsiintu ay kala soo laabtaan aqoon durugsan.
Wasaaradda Boostada iyo Isgaarsiinta ayaa wadda dadaallo badan oo kor loogu qaadayo aqoonta iyo xirfadaha shaqaalaha wasaaradda iyadoo ay wasaaraddu ku tala jirto in sanadka cusub ay fuliso hawlo badan.
Wasaaraddu waxey ku tala jirtaa iney shaqaale badan oo kale u dirto dalka dibaddiisa si ay ugu soo qaataan tababaro ay aqoontooda kor ugu qaadaan.
