Wasaaradda Caafimaadka dowlad Goboleedka Galmudug ayaa maanta si rasmi ah u daah furtay shirka isku xirka mashaariicda Caafimaadka deegaanada Galmudug, kaasi oo muddo labo cisho ah ka socon doona magaalada Dhuusamareeb.
Sida uu qorshaha yahay Shirka ayaa waxaa ka qayb galaya dhamaan hey’addaha ka shaqeeya Caafimaadka, Nafaqada iyo fayadhowrka ee ka howlgala Deegaanada Galmudug.
Kulankan ayaa dib loogu eegayaa waxii ka qabsoomay sadaxdii bilood ee lasoo dhaafey arrimaha Caafimaadka, Nafaqada iyo fayadhowrka, iyadoo lagu Soo bandhigayo culeesyada jira iyo meelaha aan wali wax laga qaban ee u baahan in lagu daro qorshaha sadaxda bilood ee soo aaddan.
Mas’uuliyiinta ka socotay hey’addaha kala duwan ee kulankan ka qayb galaya ayaa laga dhageystay soo jeedintooda oo ku qotontay mashaariicda ay ka wadaan meelo kala duwan oo Galmudug ka mid ah.
Agaasimaha waaxda qorsheynta iyo siyaasada ee wasaarada Caafimaadka Galmudug, Cabdixakiin Maxamed Diiriye, ayaa furitaanka shirkan sharaxaad kooban ka bixiyay ajandayaasha ugu muhiimsan, isaga oo tilmaamay in ay muhiim tahay joogteenta kulamada nocaan ah.
Wasiir Dowlaha Caafimaadka Galmudug Axmed Mirre Faafaale, oo gunaanadka munaasabada daah furka shirkan warbaahinta la hadley ayaa sheegay in shirkan muhiimadiisu tahay in la sameeyo isbadalo muuqda, hadafka ugu weyn ee shirkan maantana uu yahay gudbinta fariin ku socota hey’addaha, si loo helo kaalmo dhameystiran oo wax looga qabto qaybaha gargaarka Deg Dega ah ee isbitaalada waaweyn ee Galmudug.
