Wasiirka wasaaradda caafimaadka, daryeelka hooyada iyo dhallaanka ee dowlad goboleedka Hirshabeelle Axmed C/kariin Maxamed oo uu wehliyo agaasimaha guud ee wasaaraddaasi Maxamed Cali Yuusuf ayaa deeq dawo ah ku wareejiyay mas’uuliyiinta degmooyinka Raaga Ceelle iyo Warshiikh oo ka tirsan gobolka Sh/Dhexe.
Wasiirka wasaaradda caafimaadka Hirshabeelle iyo wafdiga uu hoggaaminayo ayaa booqasho ku tegay degmooyinka Raage Ceelle iyo Warshiikh iyagoo u kuurgalay xaaladda nololeed ee bulshada ku dhaqan halkaasi, waxayna indhahooda ku soo arkeen baahida caafimaad oo ay qabaan bulshadaasi.
Wafdiga uu horkacayay wasiir Axmed C/kariin Maxamed ayaa warbixin ka dhageystay gudoomiyaha degmada Raage Ceelle Yuusuf Xaaji Maxamed oo ka warbixiyay xaaladda nololeed ee bulshada ku dhaqan degmadaasi iyo deegaannada hoos yimaada, isagoo tilmaamay ineysan jirin wax adeeg caafimaad ah oo ay heystaan bulshadaasi, wuxuuna ka mahadceliyay deeqda dawada ah ee la gaarsiiyay.
Sidoo kale wafdiga ayaa gaaray degmada Warshiikh iyagoo booqday dhowr tuulo oo hoosyimaada degamadaasi, waxeyna warbixin ka dhageysteen hoghayaha dowladda hoose ee degmadaasi,Diini Rooble Axmed iyagoo ku wareejiyay xoogaa dawo ah, halka ay kulamo kale la qaateen waxgaradka deegaankaasi.
Deeqdan dawada ah ee la gaarsiiyay labadaasi degmo ayaa ku soo beegmeysa xilli uu deegaannadaasi ka dillaacay cudurka shuban biyoodka oo ay u geeriyoodeen tiro dad ah halka kuwa kalena ay la ildaranyihiin cudurkaasi.
