Wasiirka Wasaaradda Caafimaadka iyo daryeelka bulshada Xukuumadda Federaalka Dr Cali Xaaji Aadam ayaa Safiirka dalka Shiinaha Mudane Fei Sheng lChao kala wareegay agab Caafimaad oo loogu talagaley gargaarka deg dega ah (First Aid) kadib munaasabad ka dhacday xarunta Wasaaradda Caafimaadka Soomaaliya.
Munaasabadda wareejinta agab kan Caafimaad waxaa goobjoog ka ahaa Wasiir ku-xigeenka Wasaaradda Caafimaadka iyo daryeelka bulshada Xukuumadda Federaalka Soomaaliya Dr. Maxamed Xasan Bullaale, Xildhibaan Nadiif oo ka tirsan guddiga adeegga bulshada Golaha Shacabka Baarlamaan JFS iyo xubno kale oo ka tirsan Wasaaradda.
Qalabkan ayaa wax badan ka tari doona la tacaalidda xaaladaha deg dega ah, Wasiirka horey ugu codsaday Shiinaha agabkan si ciidankeena jiida hore jooga ay u helaan gargaar deg deg ah maadaama dalka uu ku jiro dagaalka lagu ciribtirayo Khawaarijta.
Wasiirka Caafimaadka Dr Cali Xaaji Aadan ayaa Dowladda Shiinaha ku tilmaamay saaxib soo jireen ah oo marar badan garab istaagay Caafimaadka Soomaaliya waxa uuna xusey in Shiinuhu ka mid yahay dalalka xili kasta u taagan taageerada dalkeena gaar ahaan hanaanka Caafimaadka oo ah meelaha ugu muhiimsan ee bulsho laga taageeri karo si loo helo hanaan Caafimaad oo xasilan.
Dhinaca kale Munaasabadda waxaa abaal marin shahaado sharaf ah lagu guddoon siiyey Health + oo ka qeyb qaadatey fududeynta agab kan Caafimaad in uu soo gaaro Wasaaradda Caafimaadka iyo daryeelka bulshada Xukuumadda Federaalka Soomaaliya Wasiirka ayaana uga mahadceliyay dedaaladooda ay kaga qeybqaateen helitaan agabkan Caafimaad.
Wasaaradda Caafimaadka iyo daryeelka Bulshada Xukuumadda Federaalka Soomaaliya waxaa ka go’an wax ka qabashada baahiyaha Caafimaad ee ka jira Dalka iyo sidii lagu horumarin lahaa Caafimaadka Soomaaliya si loo gaaro yoolka.
