Garoonka diyaaradaha Aadan cadde ee magaalada Muqdisho ayaa kulan sagootin ah loogu sameeyay dhallinyaro loo diyaarinayo in ay ka howl galaan hay’adda Saadaasha Hawada Soomaaliya, isla markaana ay la wareegaan maamulka Hawada Soomaaliya, mudo dhowr bilood ah ayay tababbar la xiriira maamulka hawada iyo hagitaanka diyaraadaha ku soo qaadan doonaan wadanka Kenya, kuwaasi oo manta ka dhoofay isla garoonka .
Kulankaa sagootinta ah waxaa ka qayb galay Wasiirka Wasaaradda Gaadiidka Duulista Hawada Cali Axmed Jaamac, Wasiiru dowlaha Wasaaradaas iyo Agaasimaha Guud ee wasaaradda waxaana ay mas’uuliyiintu la dar daarmeen Dhallinyarada dalka dibadiisa loo diray ee la soo barayo Hawada hagidda diyaaraha.
Dhallinyarada loo tababbarayo in ay ka howl galaan hay’adda Saadaasha Hawada Soomaaliya (Civil Aviation) ayaa 50 kor u dhaafaya, waxaana ay ka kala yimaadeen magaalooyinka Muqdisho, Hargeysa iyo Boosaaso sida uu sheegay Agaasimaha guud ee Wasaaradda gaadiidka iyo duulista Hawada Sooamaliya Mudane Cali Gacal.
“Mudane Wasiir dhallinyaradaan sidaad la socoto waa dufcadii koowaad ee loo tababbarayo maamulka Hawada dalka, waxaana ay gaarayaan 50 wiilal iyo hablo isugu jirta 14 Hargeysa ayay ka soo baxeen 10 Boosaaso ayay ka baxeen 27 maanta ayaan halkaan ka direynaa waxaana ka rajeyneynaa in ay noqdaan kuwo anfaca dalkooda”ayuu yiri Mudane Gacal.
Mudane Cali Axmed Jaamac Jangali Wasiirka Wasaaradda Gaadiidka iyo Duulista Hawada Soomaaliya ayaa la dar daarmay dhallinyarada ka hor inta aysan bixin waxaana uu u soo jeediyay in ay ka faa’iideystaan cilmiga la barayo oo ah mid ka mid ah cilmiga dunida ugu muhiimsan, isla markaana ay u diyaar garoobaan shaqo culus oo ay Qaranka u qaban doonaan.
“Waxa aad aad baraneysaan waa mid ka mid cilmiga aduunyada ugu wanaagsan waaayo waxaa aad kala hageysaan diyaaradaha hawada maraya, dadkii cilmigaas yaqaanay waa shaqo gab, wixii hadda ka dambeeya waa adinka, cida badaleysa markaas waxaad ogaataan in aad tihiin qof kasta oo idinka mid ah safiir Soomaaliyeed si fiican uga faa’iideysta fursadaan muhiimka ah “ayuu yiri wasiirka Duulista Hawada Soomaaliya.
