Wasaaradda Haweenka iyo Horumarinta Xuquuqda Aadanaha Soomaaliya iyo xafiiska Jinsiga iyo Xuquuqul Insaanka ee AMISOM ayaa maanta qabtay, kulan fogaan arag ah oo ay ka qeybgaleen 25 gabdhood oo suxufiyiin ah, kaas oo ku saabsanaa tebinta warbixinada doorashada.
Agaasimaha waaxda Jinsiga ee Wasaaradda Haweenka iyo Horumarinta Xuquuqda Aadanaha, Marwo Sacdiya Maxamed Nuur, oo kulanka guddoomineysay ayaa sheegtay in gabdhaha wariyeyaasha ah looga baahanyahay in ay sameeyaan doodo ku saabsan doorka haweenka ee siyaasadda, gaar ahaan xaqiijinta qoondada haweenka ee 30%.
Sidoo kale, gabdhaha suxufiyiinta waxaa lagu boorineyaa in ay sameeyaan barnaamijyo gaar ah, oo ka hadlaya xadgudubyada ka dhanka xuquuqda Aadanaha ee dhaca, inta doorashada socoto, si gaar ah caqabadaha haweenka soo wajaha xilliga doorashada Baarlamaanka.
Kulanka ayaa qeyb ka ah, ololaha Wasaaradda Haweenka ugu jirto, sidii loo ilaalin lahaa qoonddada haweenka ee 30% oo ay ku leeyihiin labada Aqal ee Baarlamaanka Jamhuuriyadda Federaalka Soomaaliya.
