Kulankan oo looga tashanayay Hindise sharciyeedka ku saabsan diyaarinta siyaasada Qaran ee Jinsiga oo ay soo qaban qaabisay Wasaaradda Haweenka iyo Xuquuqda Aadanaha ayaa waxaa ka qeyb galay Xildhibaanno, ururada haweenka iyo marti sharaf kale, kaasi oo lagu qabtay Muqdisho.
Kulanka ayaa intii uu socday waxaa la isku weydaarsaday tallooyinka lagu biirin karo hindise sharciyeedka, maadaama uu aad muhiim ugu yahay bulshada, si loo helo sharci ka hortaga dhibaatooyinka ka dhanka ah jinsiga.
Agaasimaha Waaxda Jinsiga ee Wasaaradda Haweenka Sacdiyo Maxamed Nuur ayaa sharaxaad ka bixisay hindise sharciyeedka ay Wasaaraddu soo diyaarisay, waxaana ay intaa ku dartay in tallooyinka ka qeyb galayaasha muhiim u tahay dhameystirka sharciga.
Xildhibaan Bishaaro Cabdi Garabeey oo ka hadashay madasha ayaa sheegtay inay aad ugu faraxsantahay diyaarinta sharcigan, ayna soo dhaweynayaan kan baarlamaan ahaan.
Wasiirka Wasaaradda Haweenka iyo horumarinta xuquuqda aadanaha Sahro Maxamed Cali Samatar ayaa tilmaamtay in sharcigan uu yahay markii ugu horeysay oo la diyaariyo, ayna u gudbin doonto golaha Wasiirada, kaasi oo ka hortagi doono xadgudubyada ka dhanka ah jinsiga.
Sawir Qaade:- Maxamed Cabdullaahi Maxamed
