Wasiirka Wasaaradda Howlaha guud iyo dib u dhiska ayaa maanta amar ku bixiyay in si deg deg ah ay u joojiyan dad si sharci darro ah u dhisanaayay dhul ay laheyd Wasaaradda howlaha guud gaar ahaan garoonkii kubadda cagta LLP Jeenyo ee Dagmada Yaaqshiid.
Wasiirka howlaha guud iyo ku-xigeenkiisa oo ay wehliyaan mas’uuliyiin ka tirsan Wasaaraddaasi oo maanta howlo kormeer ah ku tegay garoonkii kubadda cagta LLP Jeenyo ee degmada Yaaqshiid, oo ah garoon ay kooxda ugu diyaar garoobi jirtay xilliyada ay ka qeyb galayaan cayaraha heer gobol iyo heer caalami, ayaa markii ay tegeyeen garoonka oo ka socotay dhismooyin sharci darro ah amar ku bixiyeen in la joojiyo dhismahaasi.
Agaasimaha Waaxda Guryeynta ee Wasaaradda Howlaha Guud Xasan Axmed Shirwac ayaa sheegay in garoonka uu yahay mid kooxda ay tababar ku qaadan jirtay, isla markaana aan la ogalaan karin in la iska dhisto.
“Garoonkaas waa garoon weyn oo baaxadisa ay la egtahay 160+120 square, isla markaana darbi weyn ku wareegsanyahay, waxaa iska leh dulkaasi kooxda kubada cagta ah ee LLP Jeenyo Wasaaradsa howlaha guud, uma dul qaadan doonto in la boobo dulalka ay leedahay Wasaaradda” ayuu yiri Agaasimaha
Wasiirka Howlaha guud iyo dib u dhiska ee Xukuumadda Soomaaliya Eng, Saalax Sheekh Cismaan ayaa ku amray dadka ku howlan inay dhistaan garoonkii Jeenyo in muddo 24 saac ay ku joojiyaan, isagoo intaa ku daray in ciddii ku adkeysata laga qaadi doono talaabo sharciga waafaqsan.
Wasiirka waxa uu xusay in dhawaan ay dib u howlgelin doonaan garoonka, si kooxda ay fursad ugu hesho inay tababaro ku qaataan garoonkoodii hore.
