Wasaaradda Qorsheynta, Maalgashiga iyo horumarinta dhaqaalaha XFS ayaa Maanta daah furtay shir wada tashi ah oo ku aaddan istraatijayadda qorshaha hay’adda Caaalamiga ah ee socdaalka (IOM), Sanadka 2019-2021-ka.
Shirkan ayaa waxaa goobjoog ka ahaa Xoghayaha Joogtada ah ee Wasaaradda qorsheynta, maalgashiga iyo horumarinta dhaqaalaha Dalka ,Mudane Cabdiqaadir Maxamed Aadan, Madax ka socatay hay’adaha Dowladda Federaalka Soomaaliya iyo Maamul Gobaleedyada.
Ka qeybgalayaasha ayaa aragtiyo kala duwan ka dhiibtay qorshaha 2016 -2018 ee hay’adda IOM ay ka qabatay Dalka iyo waxyaabaha ay ku guuleysatay, howlaha haatan socda , wixii aan u qabsoomin iyo waxyaabaha sababay.
Waxay sidoo kale soo bandhigtay Istraatijiyaddeeda ee ku saabsan qorshaheeda cusub ee ku talagalka howl-galkeeda 2019-2021-ka, taas oo lagu saleynayo baahiyaha Bulshada Soomaaliyeed.
Xoghayaha Joogtada ah ee Wasaaradda qorsheynta Dowladda Federaalka Soomaaliya , Mudane Cabdiqaadir Maxamed Aadan oo furay shirkan ayaa sheegay in Dowladdu ay ka go,an tahay isla xisaabtanka hay’adaha Beesha Caalamka ay ka fuliyeen Dalka .
“Waxaan Maanta ku faraxsanahay inaan idin kala soo qeyb galo wada tashigan ku aaddan qaabkii loo fulin lahaa mashaariicda IOM ay ka waddo Soomaaliya, waxaan ka wasaarad ahaan billownay dar-dargelinta mashriicda ka socda Dalka iyo qaabkii loogu salayn lahaa baahiyaha gaarka ah ee Dadka Soomaaliyeed, ”ayuu yari Cabdiqaadr Maxamed Aadan, Xoghayaha Joogtada ah ee Wasaaradda qorsheynta.
Sidoo kale qaar ka mid ah ka qeyb galayaasha ka socday Dowladda Federaalka, maamul Gobaleedyada iyo madaxda ka socotay IOM ayaa is dhaafsaday aragtiyo la xariira hannaanka mashaariicda socday, caqabadahii laga bartay mashaariiicdii hore si aysan u soo laaban.
Tallaabadan ayaa qeyb ka ah isla xisaabtanka Dowladda ee ah in la ogaado hay’adaha shaqada ka wada Soomaaliya iyadoo lagu saleynayo baahiyaha dhabta ah ee Dadka Soomaaliyeed,waxanay Dhabbaha u fureysaa wada shaqayn dhex marta hay’adaha caalamka iyo Dowladda dhexe.
