Agaasimaha Guud ee Wasaaradda Qorsheynta, Maalgashiga iyo Horumarinta Dhaqaalaha Mudane Cabdifaatax Cabdulqaadir Faarax, ayaa ka qeyb galay kulan wadatashi ah oo ku saabsan Qorshaha Maalgashiga Khayraadka Biyaha ee Webiga Shabeelle.
Kulanka oo ay soo qabanqaabisay Wasaaradda Tamarta iyo Kheyraadka Biyaha ayaa looga hadlay maalgashiyada istiraatiijiga ah ee Webiga Shabeelle, gaar ahaan Mashruuca Kaydinta Biyaha ee Jowhar (JOSP), maaraynta biyaha, wax-soo-saarka beeraha iyo u adkeysiga isbeddelka cimilada.
Agaasimaha Guud oo ka hadlay furitaanka kulanka ayaa hoosta ka xariiqay muhiimadda ay leedahay in maalgashiyada Webiga Shabeelle la waafajiyo Qorshaha Isbeddelka Qaranka (NTP 2025–2029) iyo mudnaanta horumarineed ee dalka, si ay uga qeyb qaataan xoojinta sugnaanta cuntada, nolol-maalmeedka bulshada iyo horumar waara.
Webiga Shabeelle wuxuu laf-dhabar u yahay horumarinta beeraha iyo dhaqaalaha dalka, taas oo ka dhigaysa qorsheynta maalgashigiisa arrin muhiim u ah horumarka Soomaaliya.
